Afpakteam di Aruba ta pone beslag riba dos cantidad grandi di placa

ORANJESTAD – Recientemente Afpakteam di Aruba a pone beslag riba dos suma bastante grandi di cen. Asina vocero di ministerio publico Ann Angela a confirma awe mainta pa NoticiaCla.

HAF DI BARCADERA

Den haf di Barcadera a tuma beslag riba un suma di mas cu 14.000 Dollar durante un accion di control di Aduana contra arma y droga. Durante e control aki, dos tripulante di un barco a wordo listra. Nan no a haci aangifte na Aduana di e placa cu nan tabatin cu nan, y nan no tabata tin intencion tampoco pa haci esaki. Den cooperacion estrecho cu KPA y Aduana e suma di placa a wordo tuma den beslag bou guia di Ministerio Publico. Ambos tripulante a wordo deteni, como tambe e capitan di a barco. Nan ta wordo sospecha di labamento di placa. E investigacion ta continua.

BURACHE CU PLACA

Den e di dos caso un sospechoso a wordo deteni pa via di buracheria den publico. Ora cu ela wordo listra, a topa cu 6.500 florin y 4.895 dollar. E sospechoso tabata ilegalmente na nos isla y tabata aki poco tempo. Tin varios sospecho contra dje y ademas e no por a duna ningun splicacion concreto y verificabel tampoco tocante di unda e placa a bin. Ela tuma afstand mes ora di e placa cu a wordo tuma den beslag cerca dje.

E afpakteam ta un cooperacion di Ministerio Publico, Cuerpo Policial di Aruba, Aduana, FIOT (Fiscale inlichtingen- en opsporingsteam) di DIMP (Departamento di Impuesto), FIOD (Fiscale Inlichtingen- en Opsporingsdienst), KMar (Koninklijke Marechaussee), Kustwacht di Aruba, MOT (Meldpunt Ongebruikelijke Transacties y RST. E Afpakteam ta ocupa su mes cu combati criminalidad financiero economico. Crimen no mag di paga! Riba prome di maart di e aña aki, Afpakteam a cuminsa traha.

Si bo persona por sa di señalnan di labamento di placa, bo por acerca Afpakteam via mail na afpakteam@kparuba.com of via tiplijn na 11141.