Gobierno ainda no ta premira fluho di Venezolano pa Aruba

ORANJESTAD – Tin un comision cu ta traha ariba un plan di calamidad si algo pasa na Venezuela. “Nos no ta premira, ni spera cu algo lo sosode” minister di permiso Benny Sevinger a bolbe sigura NoticiaCla. “Si nos haya un fluho di personanan cu ta busca asilo den region, e ora ey e plan di gobierno pa loke ta un calamidad, nos lo consider'e. E ora ta minister presidente ta dirigi esaki hunto cu tur e diensten di gobierno” e mandatario a bolbe bisa.

SITUACION NA VENEZUELA

Manera ta conoci, e situacion na Venezuela ta birando cada dia mas pio y tin botonan ta sigui yega nos isla y di Corsou cu Venezolanonan cu intencion pa busca un mihor porvenir riba nos isla. Den cuadro di esaki, a puntra e mandatario un biaha mas si tin un plan pa atende cu un eventual situacion cu por bira un ‘calamidad’. Den pasado e portal aki a raporta riba un plan cu tin den desaroyo, y unda cu p.e. a leak informacion cu ta pensando pa uza tereno na Dakota pa un posibel centro di refugio pa Venezolanonan cu yega Aruba. Mes momento a compronde cu un grupo deportivo a haci peticion na gobierno pa haya e tereno aki (ex tereno di Little League na Dakota), pero cu DOW a bisa e portal aki e tempo ey cu a desconseha contra un ‘tercer otro partido’, cu despues a resulta di ta e grupo di deportista. Nan a mustra (DOW) cu nan tin prioridad riba e tereno aki. Ademas a compronde cu tin un otro plan cla, cu ta pa uza e centro di Frans Figaroa tambe como un centro di refugio pa un grupo di entre 500 pa 1000 Venezolano.