ANSA cu sistema nobo innovativo di mensahe pa trafico aereo

ORANJESTAD - Siguiendo e standardnan y recomendacionnan di ICAO (International Civil Aviation Organization) pa supera e limitacionnan ora di transmiti y ricibi mensahenan aeronautico manera Flight Plan, Notice to airmen (Notam) y mensahenan meteorologico riba e sistema anticua “Aeronautical Fixed Telecommunications Network” (AFTN), mas y mas proveedornan di servicio di trafico aereomundialmente ta cambia pa e sistema nobo y moderno di AMHS (Air traffic services Message Handling System). Air Navigation Services Aruba N.V. (ANSA) no a keda atras den esaki. Manera ta conoci, e seccion di Luchtverkeersbeveiliging (LVB) di Departamento di Aviacion Civil entrante 1 di januari 2015 a wordo privatisa y converti den un N.V. nobo di gobierno, esta ANSA N.V. Desde su inicio un di e metanan principal di ANSA tawata pa elimina mas pronto posibel e atraso di inversion den ekipo y sistemanan pa maneho di trafico aereo. Den aña 2017 por ehempel ANSA lo ta invertiendo un suma di 5.5 miyon florin, cumpliendo asina cu e meta menciona. Cu un inversion di riba 1 miyon florin y despues di un periodo di preparacion di mas of menos 1 aña, e compania Thales Air Systems S.A.S. di Francia a completa instalacion di e sistema di AMHS na april ultimo. Despues di pruebanan extenso y riguroso ehecuta conhuntamente cu FAA NEMC (Federal Aviation Administration Network Enterprise Management Center) na Atlanta, USA pa sigura cu e sistema ta cumpli cu tur rekisito, ANSA ta cla pa haci e transicion pa e sistema nobo di AMHS diamars awor 11 di juli 2017 den oranan di mainta. Ventahanan cu e sistema nobo di AMHS ta brinda compara cu e sistema anticua di AFTN ta lo siguiente:- Tecnologia moderno di TCP/IP (Transmission Control Protocol/Internet Protocol) enbes di X.25.- Speed di transmision hopi mas halto.- Grandura di cada mensahe den caracter ta mucho mas grandi compara cu e limitacion di 1800 caracter riba AFTN.- Por inclui mensahenan grafico.- Por inclui mas recipiente di mensahe.- Mucho mas confiabel. Cu esaki Aruba ta bira un di e prome paisnan den Caribe cu ta riba e netwerk di AMHS y asina ANSA ta sigui cumpli cu su vision di ta un lider den nos region den provision di servicio di trafico aereo cu standardnan halto.