Situacion financiero di aeroliña PAWA den disputa

PHILIPSBURG/ SANTO DOMINGO – E aerolinea cu a tuma mayoria di e buelonan internacional di InselAir, tin problema financiero serio. Por lo menos segun e gerencia di e aeropuerto di Republica Dominicano esta Aerodom Siglo XXI. Diabierna ultimo den un comunicado di prensa, esnan di e aeropuerto a bisa cu lo pidi autoridad pa investiga e situacion economico di e aerolinea. Motibo ta e debe di riba un miyon cu e aerolinea tin cu e aeropuerto (US $ 1,062,809.61 ). E aerolinea (PAWA Dominicana) ta ofrece buelo pa Miami, Puerto Rico, Haiti y Cuba, y e.o Aruba. No ta conoci si nan tin debe na Aruba tambe. E debe cu PAWA tin, ta entre otro uzo di facilidad di e aeropuerto manera parkeo, aterizahe, uzo di e bridgenan, y mas. Segun e comunicado di e aeropuerto, a haci varios intento pa cu e pago, pero esaki no tabata exitoso. Segun informacion, solvencia financiero di e aerolinea ta un di e condicionan pa nan mantene nan permiso economico cu ta permiti e aerolinea opera comercialmente.