Celebrando 2 aña den forma poderoso na PowerFM

ORANJESTAD – Celebra un aniversario radial semper ta mas special cu cualkier otro evento. E dinamismo di un emisora ta dune multiple posibilidadnan pa esey. Y cu un director manera e veterano radial Ruben Garcia na cabes, e posibilidadnan ta simplemente esey. Como tal no ta sorpresa cu un siman despues di e fecha oficial, –nan a celebra nan di dos aniversario 1 di september ultimo-, e celebracion ta leu di cla. Si nan a celebra nan fiesta ‘interno’ cu toch hopi buya siman pasa partiendo 101 presio na tur, –mainta tempran cu Robert Maduro te anochi laat cu Monditho su Kompa-, e fiesta grandi mes ta e fin di siman aki.

Diasabra awo 13 di September e emisora ta celebra pa pueblo riba Eagle Tennis Park cu bandanan manera Buleria, NSTPLAY, Tsunami y Simplemente Pa Bo., compaña cu un celebrity futzaal. De hecho, cualkier celebracion menos cu esey, lo no ta digno di Garcia y su crew hoben, cu ta conta tambe cu e otro veterano “Melvin “Sobrinito” Garcia, Julie Julie, te na esun mas ‘nobo’ Ralph “Ojojoy” Maduro.

For di momento cu Garcia a tuma rienda di un emisora existente 2 aña pasa y bolter esaki completamente y yene cu ‘poder’, e la conoce un sin fin di cambio, -algun basta radical-, cu a conclui recientemente cu incorporacion di e sistema AVRA den aire. E ta envolvi henter un cambio di pensamento radial (y radical) unda cu 4 camera HD, ubica riba e mike stands, ta bai on na momento cu e DJ cuminsa locuta, como tambe ora di entrevista cu un invitado “ Mundo completo por sigui via un link riba nan computer, iPad, celular na unda cu nan ta. Pues awor e oyente a bira un ‘tele’ oyente”, Garcia ta bisa orguyosamente.

E emisora den su formato poderoso cu ta yama su mes “Power 101.7 FM”, a sa di gara e mercado radial usando talentonan conoci, pero tambe inyecta e señal cu talento nobo, fresco y hoben pa asina mantene e nivel ‘al caso’ riba tur nivel. Adkisicion recien di Gwen Wever den benta –a haci esaki den un forma unico tambe-, pa fortalece e team di Ivan Kelly Jr den e departamento tabata algo cu ta duna e emisora e ‘push’ comercial necesario pa bay dilanti. Na tur, Power FM ta sigura cu nan tey pa keda y cu Ruben Garcia na timon, spera aun mas ‘sorpresa’ na caminda. Ta spera un y tur diasabra awor pa nan celebracion ‘publico’ di nan di dos aniversario.