Partido nobo RAIZ: Sticker y bandera ta polarisa y dividi un pueblo

ORANJESTAD - Uzo di sticker, bandera y t-shirt ta polarisa y dividi un pueblo den un campaña electoral. Algo cu e partido nobo RAIZ lo abstene di dje. E hobennan Ursell Arends y Tai Foo Lee a lansa e partido durante un conferencia di prensa y mustra kico e partido hoben y nobo ta para p'e. Ambos persona ta profesionalnan hoben, y ta aspira pa participa na e proximo eleccion den un forma diferente y moderno. Sin uzo di bandera y sticker of t-shirt, nan kier mustra cu esey ta e manera nobo pa anda cu politica. 

CAMBIO PA UN LISTA

E hecho cu nan ta young professionals, nan participacion den politica ta wordo limita, y nan filosofia no ta cuadra cu e partidonan tradicional. "E filosofia di uni un pueblo no ta biba den e partidonan politico tradicional. Como tal nos a dicidi di lanta algo cu ta un politica nobo, aire fresco y algo totalmente diferente di loke Aruba ta custumbra cu ne" Arends a bisa. Uzo di sticker, bandera y t-shirt ta un formula di polarisa y dividi un pueblo. Y nos ta para pa union" Arends a sigui bisa. Nan meta ta pa logra drenta parlamento, y lo participa cu un lista di entre 10 pa 15 candidato. Nan tin 10 caba, y ta buscando algun mas cu lo wordo presenta proximamente, hunto cu nan programa di partido.