Dowers: Posiblemente por soluciona problema di rijbewijs awe

ORANJESTAD - E supuesto problemanan cu tin relaciona cu validez di e rijbewijs na Aruba, lo por wordo clarifica den curso di dia awe. Asina minister encarga cu e departamento ey, Arthur Dowers a sigura NoticiaCla diabierna mainta. E ta lamenta e forma con e noticia a wordo presenta riba validez di e rijbewijs. "Tin un discusion over e beschikking. Nos ta check aworaki si e beschikking bieu no ta cubri, y cu e ta un technicality y cu e no ta haci nada na e contenido di e rijbewijs. Si ta asina, e ta wordo regla" Dowers a sigui bisa. No ta asina, segun Dowers, cu e rijbewijs no ta bon. 

TA ADMITI CU POR HACI FOUT AWOR

E mandatario ta admiti cu tabatin un discusion pa bo preveni cu por haci fout riba e rijbewijs. E ta algo cu por wordo soluciona relativamente facil, cu ta algo cu a sosode den pasado caba. "As we speak, nos tin un reunion cu esnan responsabel pa esnan di rijbewijs. Mi ta spera cu dentro di algun ora nos tin un claridad completo riba kico posiblemente ta e fayo technico cu tin. Pero no ta asina cu di e 30 mil rijbewijs cu a wordo duna, nan no ta valido y no por wordo uza". 

NOTIFICACION DI CSE

Como cu e rijbewijs no ta wordo traha conforme ley, (Landsverordening Wegverkeer), e no por wordo uza como medio di identificacion legitimo pa e proximo eleccion. Si kier uza rijbewijs toch ainda pa e eleccion aki, minister cambia e beschikking (ministeriele regeling ter uitvoering van artikel 2) cu forsa retroactivo, y si tur ciudadano controla nan datos riba e rijbewijs.  Asina Conseho Supremo Electoral a informa pa medio di un aviso cu a sali den medionan di comunicacion e siman aki. Inoficialmente NoticiaCla a compronde cu esaki lo sosode proximamente tambe, esta cambia e 'beschikking'.

PROBLEMA CU A SURGI

Tabata despues cu e portal aki a entrevista e presidente saliente di Conseho Supremo Electoral Hubert Maduro, cu e asunto di validez di rijbewijs a bira un 'batata cayente' y cu a haya hopi reaccion den comunidad. Basa riba esaki, CSE a emiti un clariricacion di nan punto di bista, cu un splicacion amplio riba e 'uzo di rijbewijs pa e proximo eleccion di 22 september 2017'. E hecho cu minister di husticia Arthur Dowers a reacciona contra e director y desmenti gran parti di e 'kehonan', no a yuda e situacion anteriormente. E mandatario a declara den prensa e.o. cu e rijbewijs ta safe, y cu loke ta wordo declara 'no ta corecto'. Ela priminti e portal aki mientrastanto un entrevista riba e tema proximamente. 

CLARIFICACION

Den e aviso di CSE ta splica entre otro cua ta e formanan di identificacion pa e eleccion. Y di e tres formanan, normalmente un di nan ta e rijbewijs. Pero segun CSE, den e forma actual, e rijbewijs no por wordo uza como un identificacion pasobra 1, e no a wordo traha segun e ley cu ta protehe trahamento di rijbewijs, y 2. e no ta contene e medidanan di seguridad conforme e areglo ministerial manera specifica den articulo 2. CSE ta considera e situacion pues un 'problema huridico' y ta yam'e un 'juridisch knelpunt'. Ademas CSE ta haci mencion di por lo menos 3 punto extra pa cual no por uza e rijbewijs pa e proximo eleccion. 

INFORMACION CU NO TA CUADRA

Investigacion adicional cu CSE ta uza, ta haci mencion di 1500 rijbewijs di cual nan informacion no ta cuadra cu e informacion na CENSO. Esey ta for di un grupo di 30.000 rijbewijs cu a keda emiti entre juni y december 2016. Di pruebanan sporadico, a nota cu di 10 rijbewijs controla entre e 1500, 8 tabatin problema cu e nombernan riba dje. Tin fayonan ora di skirbi (tikfouten) e nombernan riba e rijbewijs. 

BASTA HENDE NO TIN PASAPORTE VALIDO 

Tambe CSE ta mustra cu di e 71.000 votadornan valido, mas di 60.000 tin sea un pasaporte of ID valido. E resto (10.000) no tin y como tal ta sugeri pa laga traha un pasaporte of ID valido pa por uza pa eleccion. Esaki mester sosode si, den e periodo prome cu eleccion. 

ELECCION HUSTO Y CONFIABEL

E CSE ta mustra cu nan ta un organo independiente y responsabel pa un proceso ordena, confiabel y safe di e proximo eleccion na Aruba. "Nan tin cu cuida e maneho dentro di e margen di ley y reglanan di e kiesverordening y cu e ta sigui ordena. Como tal ta necesario pa esaki tambe keda regla

DESICION DI CSE

Pa logra tur esaki, CSE a dicidi cu lo considera rijbewijsnan di 2015 como valido, unabes cu minister di husticia cambia e areglo ministerial (beschikking) cu forsa retroactivo, pa acomoda e 'fayonan'. Tambe ta conseha tur ciudadano votador pa controla nan rijbewijs pa eventual fayonan riba dje y informa di esaki corectamente. Y finalmente CSE ta sugeri pa ainda ciudadanonan laga traha nan ID y of pasaporte na tempo.