Fusion entre WEB y Elmar no ta reduci tarifa

ORANJESTAD – Un fusion entre e companianan di utilidad WEB y ELMAR no ta nifica un reduccion di tarifa di awa y coriente. Esey ta pensamento di minister di utilidad Mike de Meza na NoticiaCla.com. E mandatario e siman aki a splica cu un eventual fusion asina, tin su merito y balor pero den otro forma manera miho productividad y sigur servicio. “Pero no necesariamente cu e tarifa ta baha” e mandatario a sigura NoticiaCla.com.

Na inicio di Gabinete Mike Eman I, e topico aki no tabata un prioridad, esta e fusion. Y e ta un pensamento logico segun hopi, mirando cu e tabata un precupacion di e sindicato SIWA e tempo ey. Un fusion semper ta nifica reduccion di personal, cu ta algo cu ningun sindicato ta di acuerdo cune. Como tal no kier a ‘rock the boat’ e tempo ey. Mas den e periodo di gobernacion, e mandatario tabata papia mas habri riba e topico aki, incluso e pensamento di sindicato tambe a cambia.

Pero un fusion cu intencion pa reduccion di tarifa di awa y coriente no ta un pensamento corecto segun e mandatario. E pensamento a bin despues cu e director di WEB mes a bisa cu un di e motibonan di aumento ta cu e salario di e personal ta hopi y mientras cu e pueblo a reduci nan consumo, e cantidad di personal si no a baha. Como tal a surgi e pensamento cu un fusion lo por reduci e personal den forma di restructuracion, reduciendo asina tambe e gastonan di personal.

Segun e mandatario, un fusion entre WEB y ELMAR ta nifica miho servicio, un miho sinergia entre e dos companianan, y sigur por ‘bespaar’ riba cierto gastonan. E no a bisa exactamente ki tipo di gastonan si. E ta evita si, pa tin doble personal pa cierto servicio, doble directiva, etc. Na tur, e mandatario ta sigura NoticiaCla.com cu si dado caso bin un fusion, cual e ta habri pe, tin hopi beneficio pa e compania mes y tambe pa e comunidad, pero no necesariamente e tarifa.