Compania cu a emplea trahadonan indocumenta di Westin lo haya multa tambe

ORANJESTAD – E compania di construccion (nan) cu a emplea trahadonan indocumenta, lo haya multa. Y si mester, lo multa e compania doño di e hotel (den e caso aki RIU PALACE) pa ta pone trahadonan illegal traha den construccion y remodelacion di loke tabata Westin Hotel. Minister di Labor Paul Croes su reaccion na NoticiaCla ta basa riba e critica di e razzia na e hotel den weekend. Aki durante un operacion grandi diasabra, a detene un cantidad grandi di trahado illegal cu ta labora den actualmente den e parti di re/construccion. E operacion a conta cu varios departamento for di polis te na warda nos costa y K9, lidera pa e departamento di husticia. Na final, un total di 70 persona a keda deteni y encarcela, pendiente nan situacion di permiso. Nan no por a demostra ningun clase di documentacion, pa cual a opta pa detene nan te proximo aviso. Otronan cu tambe a wordo deteni, a wordo laga bay cu e acuerdo cu nan tin cu drecha nan asuntonan dialuna na entre otro DIMAS y tambe otro instancia.

E critica sinembargo ta basa riba e hecho cu semper ta gara e trahadonan cu ta traha, pero no a doño mes, of e compania responsabel pa emplea e trahadonan aki. Den e caso specifico aki ta trata di companianan subcontratista cu Riu Palace a contrata pasobra nan no a haya permiso di gobierno pa importa e cantidad di trahado necesario pa por haci e trabou. Algo cu e minister a confirma diadomingo tambe na NoticiaCla. “Y mi ta sigura cu nan lo no haya permiso pa esey tampoco” Croes a sigui bisa. E mandatario a hustifica e hecho cu no a duna permiso, basa riba cifranan di desempleo (actual 6.7%) y kier purba acomoda e hendenan aki prome cu busca permiso pa stranhero. “E ta un señal pa tur compania cu ta emplea personanan indocumenta den servicio, tin multanan halto di te hasta 25.000 florin mes” Croes a bisa.