Sindicato SPA malcontento cu situacion den cuerpo policial

ORANJESTAD - Tin malcontento den cuerpo policial segun sindicato di polis SPA pa varios motibo. Un circulario ta coriendo riba rednan social cu ta pidi cabes di mando policial y esaki ta pa varios motibo. Entre nan overtime, prohibicion di vacacion y falta di ekipo. Sindicato awe mientrastanto durante un entrevista cu Telearuba, a mustra cu nan ta rabia y cu nan no ta haya reunion cu Alto Mando. NoticiaCla.com a confirma e malcontento cu e presidente Edgar Maduro mas laat. Mientrastanto Alto Mando, Dolfi Richardson a sigura e portal aki cu e no ta altura di e kehonan aki, pero no kier a toca e tema mirando cu e cuerpo actualmente ta den luto. E no ta considera esaki etico. Sinembargo, ela duna algun clarificacion pa e portal aki. 

PROBLEMA DEN CUERPO

Un di e critica cu e sindicato a menciona, ta e.o. cu mando policial lo ta exigiendo polisnan traha 16 hora pa dia. "Awa a pasa hariña!" presidente di SPA Edgar Maduro a declara na entre otro Telearuba. Segun Maduro, polisnan ta rabia, mando policial ta exigi nan traha dobbel shift, 16 hora sigui, esnan cu pidi vakantie no ta haya, no mag meld ziek, esnan cu no cumpli lo por haye confronta cu represaya! Segun e informacion, polisnan no ta dispuesto pa sigui wanta abuso di comisario y Alto Comisario y lo ta exigi su cabes.