MIO: Lo no bringa e 'take over' di gobierno di nan operacion

ORANJESTAD - E compania di telecomunicacion MIO a kibra silencio un biaha mas, unda cu nan ta confirma cu gobierno a para nan operacion siman pasa. Ademas nan ta confirma cu nan no ta bay bringa esaki y cu nan ta cooperando cu gobierno pa e 'take over' di gobierno di nan compania. Den un mensahe riba nan pagina di FACEBOOK, nan ta gradici e clientela y mustra nan gratitud pa e chens pa por a brinda servicio pa 7 aña largo. 'Esaki ta un dia dificil y tristo, pero nos ta laga boso cu nos miho deseonan y gratitud sincero', e compania ta finalisa bisando. Adicional, nan ta publica tanto e carta di deurwaarder como esun di e director di directie telecomunicatie zaken DTZ. 

SPLICACION DI MIO

E mensahe ta cuminsa splicando cu pa 7 aña nan a haci tur den nan poder pa provee servicio extraordinario na prijsnan pagabel. Nan ta sigui splica e proceso cu a tuma lugar for di siman pasa diahuebs 29 di juni, ora cu deurwaarder a aparece na nan porta, cu e mensahe di gobierno cu nan tin cu para tur operacion. Nan ta haci mencion di e debe pendiente cu ta 15 miyon florin, y cu esaki ta mucho mas cu e suma cu nan ta ricibi na entrada anualmente. Nan ta specifica nan gastonan, y ta mustra cu nan ta semper 'break even', pero cu ta laga pa interpretacion cu mas cu esey, nan no por a paga. 

OBLIGA DI CUMPLI CU E ORDEN

Nan ta mustra cu nan no a bringa e carta y a bisa cu 'no tabatin otro forma cu di cumpli cabalmente, y a warda bishita di e director (Jansen di DTZ) pa planea un transicion apropia di gerencia. Nan ta haci mencion tambe cu nan tarea tabata pa 'take care' di nan clientenan, durante e periodo aki. Algo cu sinembargo segun minister RIchard Arends di Telecomunicacion, nan no a haci. "Nan (clientenan) ta comunicando cu Gobierno" Arends a bisa e siman aki ainda. Nan ta papia di 'Toma di gobierno', y cu nan ta 'forsa pa hala un banda y haci tur posibel pa sostene e director den tuma e control di e operacion di MIO'. Nan ta pidi comprension y cu ta spera cu tur hende coopera cu DTZ den e momento di 'cambio di gerencia' " e ta un dia dificil y tristo pero nos ta lagabo cu nos miho deseo y gratitud sincero" e mensahe ta sigui bisa. 

PARO DI OPERACION

Gobierno mas prome e siman aki a confirma cu a para e operacion di MIO y cu ta den proceso pa para comunicacion di e cellsites manualmente y cu pa fin di otro siman, e compania lo keda incomunica. E clientenan (6 mil) lo mester busca un otro alternativa y e dianan aki algun por keda comunica, dependiendo di e celsite cu ta keda activo.