FTA: Preocupa cu medidanan cla pa introduccion

ORANJESTAD – Sindicatonan ta precupa cu e cantidad di medida cu tin riba mesa, cla pa wordo introduci. Presidente di sindicato di trahadonan di Aruba FTA, Rudy Geerman ta splica NoticiaCla.com cu na final di cuenta ta e clase trahado tin cu paga esaki for di su saco, y esaki e no ta di acuerdo cune. Medida manera aumento di tarifa di coriente, AZV, recohemento di sushi y mas, ta algun di e medidanan cu Geerman ta referi na dje.

Ademas di e problema di medida, Geerman tin critica severo pa e forma con gobierno ta andando cu e asunto di dialogo. Segun Geerman, ora cu ta cumbini gobierno , ta yama tur e ‘stakeholdernan’ pa e.o. introduci medida. Asina e ta tene e sindicatonan keto y evita problema laboral. Pero ora cu ta pa introduci otro cosnan, esaki ta sosode di un forma unilateral. “Ora di medida, diripiente nan mester di nos”.

Loke cu Geerman ta cuestiona ta cu ta dicidi unilateralmente cu mester bin un hotel. A puntra pakico no a haci esaki tambe den un dialogo social. E ta di acuerdo cu tin hopi hende desemplea, y cu nan mester di trabou pero no ta sigur cu esaki ta e solucion pa e grupo di trahado aki. Na tur, Geerman no ta nada contento cu e proceso cu gobierno ta hibando.

Ta un hecho cu ultimo tempo e relacion entre sindicato FTA y gobierno no ta mucho di gaba. Recientemente caba tabatin un ‘intercambio via prensa’ entre e mandatario di turismo y Geerman riba cierto declaracionnan cu nan a cuestiona otro di dje. Un di nan ta e asunto di seramento di hotel Radisson y e problema cu esaki lo trece. Minister Otmar Oduber a cuestiona Geerman e tempo ey seriamente como sindicalista, riba e remarkenan cu, segun e mandatario, no tabata cuadra y no digno di un persona manera Geerman.