Sevinger: Prome parti di 2018 e R.O.P. nobo lo keda introduci

ORANJESTAD - E intencion ta pa den prome parti di aña 2018, e Ruimtelijk Ontwikkelings Plan (ROP) nobo keda cla y introduci. Asina e minister encarga Benny Sevinger a informa NoticiaCla e siman aki. Segun e mandatario, e comision ta trahando keto bay y tin 2 compania Hulandes, y un trekker apunta pa minister di infrastructura, pa percura pa e proposicion di cambionan por wordo aproba.

PROCESO DI ROP

Entre e procesonan, Sevinger a sigura cu na tal momento e proposicion di cambio mester bay pa comunidad por evalua esaki. "E discusion den comunidad lo tuma lugar, pero tin cu cambia e proposicion prome cu por bay comunidad". Segun e mandatario, e ta supone cu den 2018 lo ta asina leu cu e cambionan tuma lugar. "Mi no ta premira cambionan tuma lugar (pa 2017), si mi mira cuanto e trabou, y e time schedule cu tin di expertonan". Ta premira cu e prome mitar di 2018 e cambionan mester wordo ehecuta. 

REACCION DI MINISTER RIBA KEHONAN

Manera ta conoci, tin hopi keho den comunidad riba tereno y sigur esnan cu ta den tereno protehi. Casonan ta lanta tras di otro y esey tin atencion di e mandatario. Pero e mandatario ta mustra cu e tin comprension pa esey." Un ciudadano of un organisacion semper tin e derecho di bay hues, na momento cu e no ta di acuerdo cu un desicion di gobierno" Sevinger a bisa. E ta mustra cu ora tuma un desicion, ta evalua tur parti di e tereno specifico, si ta vivienda of comercial. Y nos ta tuma un desicion como gobierno. Personanan cu no ta na fabor di e desicion ey, por bay corte y nos lo tende kico hues lo bisa den casonan specifico. Y nos ta cumpli tambe cu desicion di hues" Sevinger a sigura e portal aki. Segun e mandatario, e casonan cu a bin dilanti, no a costa gobierno placa. "Te ainda no", e mandatario a finalisa bisando.