Hopi interes pa e tereno bashi riba waf den area di Freezone

ORANJESTAD - Tin hopi interes local y internacional pa desaroya e tereno actualmente marca como Freezone na waf. Asina director di APA (Aruba Ports Authority), Jossy Figaroa a confirma pa NoticiaCla. Manera ta conoci, ora cu a muda e waf di container pa Barcadera, a cuminsa 'limpia' e tereno conoci como Freezone, pa prepar'e y dun'e un otro destinacion. Ta trata di un tereno di mas di 200.000 m2, di cual 40% lo ta bay ta pa uzo publico (den forma di un parke), y 60% ta bay pa desaroya.  Ainda e proceso aki no a cambia. "Nos ta hopi leu cu ne. Nos ta trahando riba un master plan" Figaroa a sigui bisa e portal aki. E siman aki ainda un compania a haci su presentacion pa loke ta e master plan, y despues a hib'e pa gobierno pa duna aprobacion riba e destinacion cu lo dun'e. Esey no a keda dicidi ainda. 

FALTA AINDA PA TUMA VARIOS EDIFICIO

Figaroa a admiti cu tin varios parti cu tin cu wordo tumba ainda. Ademas lo kita status di freezone, pasobra ainda e tin e status siendo cu e lugar ta bashi. "Mi a compronde cu DWJZ ta trahando riba un landsbesluit cu ta pone cu asina cu e ta cla, por tumba e ultimo dos edificionan cu tin riba e tereno" Figaroa a bisa. Pa november tur cos mester ta cla, y pa otro aña februari lo cuminsa reparti e prome pida terenonan. E intencion ta pa esnan cu haya e terenonan (cumpra), desaroy'e segun e masterplan aproba pa gobierno. "Tin hopi interes, tanto local como internacional" e director a sigui bisa. Loke no kier pa sosode ta cu bin solamente condominiums, boutique hotels y oficina" Figaroa a sigui bisa. Despues lo divulga kico mas mester riba e tereno aki.