Fin di juli e 'resto' di e grua benta abou, ta disparse di waf

ORANJESTAD - E loke a resta di e grua na waf, cu fin di mei a wordo benta abou, lo 'disparce' totalmente di e sitio proximamente. Despues cu a benta esaki abou dos luna pasa, ainda e restonan ta 'tira' abou riba e tereno di waf. E intencion ta pa fin di juli proximo, e loke a keda tira abou lo mester ta completamente kita for di e tereno. "Nos a palabra cu e companianan cu a bah'e abou, cu dentro di dos luna, tur cos mester bay. Y e ta bayendo dilanti schedule" director di waf Jossy Figaroa a bisa NoticiaCla e siman aki. "E ta mustra cu tur cos ta na ordo". 

E PROCESO DI TIRE ABOU

Despues di un intento anterior fracasa, e grua di APA a wordo tumba abou exitosamente diadomingo 21 di mei den oranan di atardi. Algo despues di 1or di atardi, expertonan a bolbe haci e intento pa benta e grua abou, y asina pone fin na un era di 35 aña despues cu e grua a haci su trabou pa 3 decada na waf di Aruba. Pa seguridad a cera henter e area na waf pa cualkier eventualidad, si algo a bay robes.

PROME INTENTO

E prome intento tabata e diabierna atardi prome 3’or, pero esey a fracasa ora cu un kabel a kibra, cu tabata necesario pa ranca e grua bin abou cu ne. E ora a dicidi pa haci esaki den un di dos intento diasabra, pero biento fuerte (tin un alerta di biento fuerte na vigor) a dicidi di warda te cu diadomingo. Y den e intento aki si a logra exitosamente.

E GRUA

E grua a sirbi ATA pa mas di 30 aña, pero cu mudamento di e waf di container pa Barcadera, a dicidi cu no tin uzo mas p'e na Playa. A opta pa uz'e como restaurant of hotel, pero ningun di e intentonan aki tabata practico. A tene destaho publico y un compania Hulandes a gana esaki.