Minister : No a haya rechaso di hospital pa practica medicina

ORANJESTAD – Berdad cu minister di Salud dr. Alex Schwengle ta den combersacion cu e.o. hospital pa su mantencion di licencia medico. Pero e noticia cu hospital a rechasa e peticion aki, no ta berdad. “Mi a tende e rumornan aki” Schwengle a bisa NoticiaCla.com, pero a sigura cu nan ta netamente esey. Puro rumor. E mandatario, di profesion specialista di pulmon, mester traha cierto cantidad di ora pa dia of luna, pa por mantene su licencia medico. Y e la confirma na NoticiaCla.com cu e ta den e proceso ey. “Mi ta den deliberacion cu tanto hospital como AZV y lo percura pa tur cos cana netjes. Nada tray man of di un forma achterbaks” e mandatario a sigura e medio aki.

For di siman pasa tabata circula rumor cu den su acercamento pa hospital pa traha eynan, e lo a wordo rechasa entrada. Segun e mandatario, e tin un proceso pa cana, cu tin cu pasa p.e via gobernador y tambe parlamento. E la sigura cu tin trabou, y awor ta wardando riba e contesta di gobernador, AZV y tambe hospital pa wak kico ta pasa. “Mi no ta bay haci nada illegal” e mandatario a bisa, indicando cu e lo ta purbando di traha dos trabou cu ta conflicto di interes.

Ta conoci cu durante e gobierno anterior, e medico di cas Micheal Kelly di partido MEP, a fungi un periodo como parlamentario, pero a retira ora cu su intento pa traha como medico pa e mesun motibo –no perde su licencia medico-, a opta pa retira di politica, y dedica su mes atrobe completo na e mundo medico. Den e caso di Schwengle, e ta sigura cu e ta canando e caminda corecto pa e sigui mantene su licencia, y mientras cu e ta keda como mandatario den gabinete Mike Eman II.