Hobencito Sheyden Winterdaal a haci prome testnan caba na Hulanda

UTRECHT - E hobencito Sheyden Winterdaal ta wardando resultado di testnan haci pa docternan por determina su proximo accion. Asina e tata Edmar a pone riba su pagina di facebook awe. Manera ta conoci, Sheyden a biaha urgentemente pa Hulanda e siman aki pa su salud. Informacion tabata cu elo tin un tumor cu por ta canceroso. Su caso a haya hopi atencion ora cu e tata a informa cu e no tabatin modo financiero pa e tambe yega Hulanda pa ta cu su yiu. El a kita di trabou y cuminsa mobilisa 'shelo y tera' pa logra cera e placa necesario. AZV a informa cu mesora nan a atende cu e caso y cubri e yiu y e mama, pero no e tata. E peticion dramatico emocional di e tata a logra cu ela haya e fondonan necesario door di colecte rapido di comunidad. Nan ta na Hulanda awor pendiente e tratamentonan necesario pa e salud di e criatura di 2 aña. Foto cortesia Edmar Winterdaal.