De Veer Chain Theatres a perde caso contra gobierno

ORANJESTAD - De Veer Chain Theatres NV (The Cinemas) a perde su caso contra gobierno di Aruba awe mainta. Esey ta nifica cu hues a rechasa demanda pa dentro di 14 dia di e sentencia, gobierno otorga e tereno en cuestion (tereno di 5.500m2 situa na skina di Palm Beach/Sasakiweg) den erfpacht na The Cinemas, pa nan por cuminsa cu construccion di nan proyecto nobo. E tereno aki The Cinemas a haya derecho di opcion na comienso di e aña aki (5 di januari 2017), pero gobierno (ainda) no a traspasa e tereno den forma di erfpacht. E tardansa aki ta stroba e compania den ehecucion di su plan, y como tal a hiba gobierno corte. Hues no ta di acuerdo cu The Cinemas y a duna gobierno pues rason. 

BASE DI E CASO

E base di e caso ta, segun hues, si gobierno mester cera un acuerdo awor cu The Cinemas pa otorga e tereno erfpacht, basa riba e derecho di opcion cu The Cinemas a haya. E pregunta cardinal pa hues tabata, ki derecho e 'opcion' duna na The Cinemas ta duna nan (The Cinemas) den e caso aki. A determina den corte cu e nificacion di 'duna un cliente un opcion riba tereno', ta claramente stipula riba e website di DOW.  A base di esey, ta sali na cla segun hues, cu e 'opcion' no ta duna The Cinemas e derecho di cu un declaracion unilateral, ta conduci den un acuerdo entre gobierno y The Cinemas. 

ARGUMENTO DI CINEMAS

E argumento principal di The Cinemas ta, cu nan a cumpli cu tur e rekisitonan manera pidi pa gobierno ora cu nan (The Cinemas) a ricibi e opcion. Y como tal, nan kier pa hues ordena gobierno pa duna nan e tereno den erfpacht, 14 dia despues cu e vonnis sali. E tardansa aki ta causando nan problema cu e tereno di construccion. Nan ta mara na un contracto cu e proveedor di e productonan cinematografico (Imax), y tin chens cu nan ta perde e 'delantera' comercial si tin mas tardansa. Nan mester cuminsa construi awor, pa por keda cla na tempo (den 52 siman) y no keda pega otro aña, ya cu nan mester desaloca e lugar cu nan ta situa aden aworaki (Paseo Herencia). 

ARGUMENTO DI GOBIERNO

Argumento di gobierno ta cu The Cinemas ainda no a cumpli cu tur rekisito necesario prome cu gobierno por duna e tereno despues cu a duna e cliente e opcion riba e tereno. Ademas, minister encarga (Sevinger) tin e libertad amplio pa dicidi si e rekisitonan cu a wordo presenta, ta ok y si ta otorga e tereno. Pero segun abogadonan di gobierno, e mandatario 'tin duda den e contenido di e rapportnan cu contra partido (The Cinemas) a presenta. Entre nan tin e rapport MER. Como tal ta mucho prematuro pa duna un contesta awor caba riba e peticion. Y como tal mester rechasa e demanda. 

DESICION DI HUES

Hues a mustra cu e argumento di gobierno tin base. The Cinemas no a comproba den corte, cu y con nan a cumpli cu e rekisitonan stipula pa gobierno pa bin na remarke pa un acuerdo y otorgacion di e tereno erfpacht. Tambe no por a prueba cu gobierno, door di no contesta The Cinemas ainda, ta actuando enpugna cu principio di bon gobernacion. Tambe no ta cla pakico mester obliga gobierno pa cera un acuerdo awor cu The Cinemas. "E interes (di The Cinemas) awor no ta hustifica). E posibilidad cu por perde e cooperacion (contract) cu e compania Imax, no ta nifica cu mester core cera un acuerdo awor cu The Cinemas, den bista di hues. Como tal, a cita na fabor di Gobierno y a rechasa e demanda di The Cinemas. Ademas a permiti Aruba Birdlife Conservation (ABC), para na banda di gobierno den e caso aki. ABC a mustra cu nan interes ta riba e asunto di medio ambiente y cu e tereno en cuestion ta protegi. No obstante esaki, hues a determina cu aworaki, esey no ta e punto di orden, pero si a duna ABC rason pa bringa nan caso y para na banda di gobierno. The Cinemas tin 2 siman pa apela e sentencia. Lesa e sentencia completo AKI. Foto archivo NoticiaCla di dia cu e caso a tuma lugar dia 20 di juni ultimo.