Luydens: Censo por procesa 10.000 cedula/paspoort prome cu eleccion

ORANJESTAD - Hefe di Censo Sharin Luydens no ta mira problema pa procesa 10.000 cedula y of paspoort di awor pa fecha di eleccion (22 di september 2017). Asina el a sigura NoticiaCla diamars atardi. E pregunta ta a rais di un raportahe anterior cu ta papia di 10.000 hende cu no tin sea un cedula y of un paspoort y cu mester haci un peticion pa esaki. Mirando cu tin problema cu e rijbewijs su legalidad segun Conseho Supremo Electoral (CSE), ta conseha pa haci esaki. Pero Luydens no ta mira problema pa keda cla.

PONE ORA EXTRA PA POR ATENDE HENDE NA CENSO

Luydens a referi na e orario extra cu a anuncia e siman aki pa por atende hende. Ta algo normal cu nan ta haci den temporada di eleccion. Esey ta ensera cu e proximo diasabranan Censo lo ta habri entre 9'or pa 1'or pa duna mas hende chens pa por bin y atende cu e asunto di cedula. Esaki ta cuminsa diasabra awor te dia 29 di juli. Durante e periodo aki por duna servicio di paspoort, 

identiteitsbewijs, peticion pa documento/ uitschrijving pa muchanan di scol (pa e aña escolar nobo of esunnan cu ta bay studia afo). 

A menciona cu riba diasabra no mester di cita. Pa otro servicionan acudi den siman na orario normal.

ASUNTO DI RIJBEWIJS

Di otro banda, Luydens a referi na e declaracion di CSE, cu ta bisa claramente cu kier acepta e rijbewijs como medio di identificacion. E cuestion di CSE no ta pa trece disputa, pero e responsabilidad ta pa e cosnan cana na un manera ordena, y legal. "Y manera Hoofdstembureau a duna di conoce, manera cu minister (Dowers) pone e beschikking manera e rijbewijs mester ta, met terugwerkende kracht, e rijbewijs lo haya valides" Luydens a bisa.