Proceso pa desconecta celsites di MIO a cuminsa

ORANJESTAD -E proceso di desconecta celsites di e compania di telecom MIO a inicia e siman aki. Asina e mandatario di telecomunicacion Richard Arends a confirma pa NoticiaCla diamars atardi. E mandatario a confirma cu a 'pull the plug' diasabra manera anticipa,  y e siman aki a cuminsa cu e proceso pa desconecta tur e celsites di e compania. Pa otro siman ta premira cu tur lo ta desconecta y cu e ora MIO no ta operacional mas. Mientrastanto cu tin clientenan cu por comunica ainda, nan por haci nan preparacion pa bay otro compania sin keda desconecta. Otro siman sinembargo esey no por mas, segun e mandatario. 

DESCONECTA MIO

E proceso di desconecta no ta sin mas segun e mandatario a bisa awe tardi. "No ta cuestion di djies un switch bo ta paga y baha e señal" Arends a sigui splica. Ta fisicamente mester bay cada celsite y paga nan un pa un. Mientras cu e mandatario no por a bisa cuanto celsites tin, e la confirma cu a programa cu e techniconan di e compania riba un schedule pa desconecta tur e sitionan un pa un. Y esey pues lo tuma un siman mas. Gobierno a mustra cu mientras cu nan mester cumpli cu nan decreto di 'desconecta' MIO, nan kier haci esaki di un forma mas cabayero posibel. Y como tal a haci'e di e forma aki, dunando e cliente chens e dianan aki pa por reconecta otro caminda. A lamenta cu e compania no ta comunicando cu e clientenan."E clientenan di MIO ta tendiendo di gobierno. E no mester ta asina" Arends a sigui lamenta. 

PAKICO TA DESCONECTA MIO

E mandatario a repasa e proceso di MIO pakico nan a perde nan licencia y ta den proceso di wordo desconecta. E mandatario a recorda cu ta na maart di e aña aki a firma un decreto dunando gobierno e poder pa dentro di un periodo stipula, corta e señal di e compania, si nan no cumpli cu e debe habri di 15 miyon florin. Nan tabatin te 1 di juli pa cumpli pero no a haci tal. E debe ta cubri algun aña, esta for di 2014 bin Ariba. Cada 10 aña mester paga un suma di concecion y cada aña mester paga 1.5 miyon florin. Na tur, esaki a aumenta te 15 miyon florin si tene na cuenta cu na 2014 mester a paga e suma di 10 miyon tambe. Y MIO no a cumpli cu e pagonan aki. A hiba nan corte, a combersa cu nan, pero ningun di dos forma a logra pone e compania paga. Awor cu nan no ta operacional mas, MIO ta keda responsabel pa e debe cu a keda habri. E ta hacie dificil pa un otro compania tuma over, pasobra nan lo mester tuma e debe over tambe y ningun compania, segun e mandatario, lo haci esaki posiblemente. E hecho cu gobierno a revoca e licensia, ta algo normal pa gobierno segun e mandatario. "E ta kita e unico derecho di existencia di un compania di telecom, manera MIO".