Gomez: Si cliente cumpli tambe cu impuesto, e por biaha trankil

ORANJESTAD - Si cliente cumpli tambe cu impuesto, e por biaha trankil. Esaki tabata e mensahe cu e director di impuesto Luenne Gomez tabatin pa NoticiaCla  diamars atardi. E informacion di cumplimento di pago di multanan atrasa di Ministerio Publico ta conta tambe pa debe na impuesto (impuesto habri). Asina Gomez Pieters a confirma pa e portal aki. E noticia inicial cu ministerio publico a saca algun rato prome cu ta referi na recordatorio pa paga multa pendiente 'sino por prohibi e ciudadano di biaha pa e.o. vakantie', a crea un ola di reaccion den comunidad. Hopi ta esnan cu a cuminsa busca informacion pa wak si nan ta cay den e categoria ey of no. Otronan simplemente a cuminsa critica e forma con ta andando cu e topico aki. 

REACCION DI DIMP

E director di DIMP ta mustra cu e comunicado di OM ta corecto, pero cu nan ta atende (obviamente) e parti solamente di impuesto habri. Gomez a mustra cu no ta algo nobo, sino cu ta algo cu ta comun y corriente ora cu un cliente ta bandona Aruba definitivamente. Tin te hasta un formulario specificamente pa esaki, unda cu e.o. clientenan of comerciante cu ta bay bandona Aruba, mester yena 6 siman prome cu nan bandona nos isla definitivamente. Pa nan, e regla di 'reken af' ta conta. Pero tambe pa hendenan cu tin debe habri ainda di impuesto. Pa nan tambe esaki ta conta, esta e notificacion cu a sali ayera. "Pa nan semper tin un areglo di pago, ora cu tin debe di belasting habri". Esnan cu tin e 'areglo' aki, no tin problema y no tin cu worry cu e comunicado emiti. Esnan cu no ta sigur y of no sa si nan tin un debe habri, por yama e number general pa averigua. Tin un departamento cu ta atende cu e parti di debe habri y ta informa e cliente corectamente, unabez cu e keda bon identifica segun e reglanan vigente. 

TEMPORADA DRUK

Gomez a bisa si pa tene cuenta cu ta temporada di vakantie, un temporada druk pa varios otro motibo manera deadline pa paga varios tipo di impuesto, manera di tereno, number di auto y mas. Esey por nifica cu rij nan por ta largo. Como tal ta sugeri pa bin tempran pa por regla esaki sea personalmente of via telefon/email. Ta conoci cu e cumplimento di cliente no ta necesario manera cu e mester ta, y cu ta algo cu e colegio di supervision financiero di Aruba (CAFt) ta reclama esaki cada ora. Tin un cantidad di 50% di cliente cu no ta cumpliendo cu nan debernan di impuesto, cu tin atencion di e departamento y tambe di e director. Mes momento a menciona cu ta trahando pa alcansa e atraso den forma structura. "Di otro banda nos ta verwacht cu e clientenan tin e madures pa ora cu nan tin un aanfgifte, cu nan ta entrega esaki y paga corespondiente" Gomez a sigui bisa. 

CRITICA RIBA  DIMP PA PAGO DI RESTITUCION

Un di e criticanan cu por a tende mesora, ta cu DIMP kier cobra tur hende awor prome cu e cliente bay cu vacacion, pero cu nan no ta paga e restitucion cu nan tin derecho ariba. Prome cu nan por pensa di cobra e cliente, nan (DIMP) mester percura pa nan cosnan mes ta na ordo prome. Gomez a mustra mesora cu esey ta sosodiendo. De hecho a alcansa e atraso di ultimo aña y a logra varios aña caba desde cu el a sinta como director. "E ta un comentario valido" Gomez a bisa, refiriendo na e critica lansa. "Nos tur ta pagado di belasting, incluyendo e funcionarionan di belasting. Nos tin cu duna voorbeeld pa zorg pa nos mes tin nos cosnan priva paga" Gomez a bisa. Ela admiti cu tabatin un atraso grandi di restitucion. Na 2015 a cuminsa cu 'boekjaar 2009'. "Si tur cos ta bon, nos ta preparando pa e siman aki nos cuminsa hinka e aangifte IB 2013 den e sistema y nos ta premira cu pa 2014 tambe wordo geregeld e aña aki. Pues den 2 aña y mei di tempo, nos a haal in 6 aña" Gomez a bisa. Scucha e entrevista completo AKI.