Docente 'Suki' Croes a gana minister Hooyboer den corte

ORANJESTAD - E docente Sugail Croes, conoci den comunidad como 'juffrouw Suki' a gana su caso contra minister di enseñansa Michelle Hooyboer Winklaar awe, den un sentencia cu a dura 1 aña pa wordo declara. E caso mes cu Croes a inicia, a cuminsa dos aña pasa, y cu e sentencia awe ta haya clausura. Hues a dicta na fabor di Croes, indicando cu su protesta contra medida tuma contra su persona pa sigui un tratamento pa su temperamento, ta incorecto. Ademas tur otro medida tuma contra dje dos aña pasa ora cu tabatin un incidente cu a conduci na e caso, tambe ta bari for di mesa. 

E CASO

E caso ta data di februari 2015 ora cu un mayor a keha e juffrouw pa a 'bully' su yiu. Un caso cu a haya hopi publicidad y cu a crea un ola di reaccion den comunidad. E caso inicialmente lo a wordo resolvi internamente cu tur partido envolvi, pero despues toch a haya un buelta diferente cu a bin conduci cu medidanan impone riba e docente. Inicialmente e sindicato di maestro SIMAR a cay aden y sostene e docente, pero esey a bin cay na caminda. E docente a cambia di abogado y cuminsa bringa e medidanan impone contra dje. E medidanan a keda impone na maart 2015, a inclui un suspension di 5 dia di su funcion, cambio di funcion temporal, y un tratamento medico pa su temperamento. Pero despues e mandatario a laga tur medida cay, cu excepcion di e parti di sigui un tratamento pa su temperamento. Gobierno a instrui un comision pa investiga e caso y e resultado tabata parti di e caso. E caso mientrastanto a sigui exclusivamente riba e ultimo medida cu tabata e tratamento pa caracter di e docente. Un comision institui, a determina cu e docente a actua 'no pedagogico, y cu e medidanan impone, ta na su lugar. E caso mes a bin dilanti 4 biaha den un periodo di un aña (2015-2016) y a tarda un aña pa bin cu un sentencia.

ARGUMENTO DI HUES

Hues a argumenta na final, cu tin duda cu e conclusion di e comision ta corecto, y ademas si e medida tuma contra e docente, ta riba base corecto tuma. Pa e hues, ta parce cu e medida aki no a wordo impone pa motibo cu e docente a actua no pedagogico, sino mas bien pa supuestamente e caracter fuerte cu e docente tin.  Ademas hues ta duda cu e caracter fuerte di e docente realmente ta rekeri e medida impone. Esaki no, segun huez, a wordo motiva suficiente den e caso. Cu e actuacion di e caracter di e docente tabata mas cu solamente un situacion incidental, no por a wordo deduci di e resultado di e trabou di e comision. Como tal hues a dicta cu e medida impone contra e docente, no tin base y cu e protesta contra esaki ta bon funda. Como tal a dicta na fabor di e docente, y a ordena pa e mandatario cubri gasto di e docente. Lesa e sentencia AKI.