A inicia cu rotonde grandi pa proyecto Watty Vos Boulevard

ORANJESTAD - Awe mainta tabatin e comienso di e prome di 10 rotondenan  pa e proyecto Watty Vos boulevard. Cu un ceremonia di groundbreaking, a duna inicio pues y ta premira pa aki 3 luna e rotonde aki, similar cu esun di esun di Mahuma, lo keda cla. Segun director di DOW Marlon Croes a splica NoticiaCla awe mainta, e hecho cu tin tanto atencion y ceremonia pa e rotonde, ta netamente pasobra e ta e prome di 10. Pues comienso di un proyecto grandi atrobe. E director no por a duna un prijsplaatje pa e rotonde so, mirando cu e ta forma parti di un proyecto total di Watty Vos, y esey ta balora na riba 170 miyon florin.

PROCESO PA TRAHA E ROTONDE

E proceso e biaha aki pa traha e rotonde, tabata diferente unda cu a opta pa traha net rond di e rotonde, y no crea cantidad di desvio manera ta haci otro biahanan. "Naturalmente unda cu nos traha, nos ta purba pa no obstaculisa fluho di trafico" Croes a bisa. E biaha aki a dicidi pa yega na un acercamiento hopi mas miho unda cu ta traha un rotonde profesorico temporal rond di e ronde. "Esey caba den un solo trabou bo mira, ta un ayudo grandi caba pa esunnan cu ta bin for di airport y ta yega na e crusada T. E comentarionan ta positivo" Croes a bisa. Como tal por mir'e como un preview di con e lo ta ora cu e rotonde mes keda cla. Claro cu na dado momento mester desvia trafico pa conecta e 'pianan na otro'. "Esey lo sosode oranan di anochi of un of dos dia pa e desvia ta minimal". E termino pa caba cu esaki ta 3 luna, cu ta significa cu ta banda di october esaki lo ta.