NoticiaCla.com ta cumpli 3 aña di existencia awe!

ORANJESTAD - NoticiaCla.com awe ta celebra e aña di existencia y como tal ta di fiesta. Tabata exactamente 3 aña pasa (2 juli 2014) cu e website www.noticiacla.com a wordo lansa den aire pa e tempo ey su excelencia minister di telecomunicacion Mike de Meza.  Tres aña despues e website por ta orguyoso di ta un medio respeta den comunidad y cu ta wordo uza grandemente tanto local como internacional como E fuente di noticia di confiansa. Despues di tres aña, e portal ta sigui mas solido cu nunca y a te hasta solidifica su lugar den comunidad local y internacional.  Manera cu nos a haci tur aniversario, NoticiaCla.com kier cuminsa na gradici tur su patrocinadornan, sigur esnan cu desde su comienso, a deposita nan confiansa. "Sin boso, atrobe e website aki no ta posibel y sigur no por a crece grandi manera cu e ta". Awe nan tur t'ey keto bay y a sigui cu NoticiaCla.com y confirma nan participacion pa largo. Y hunto cu nan, otronan a sigui nan paso y tambe ta y a confirma nan participacion pa largo. Pa esey, nos ta bisa DANKI. 

FUTURO DI NOTICIACLA 

Manera cu NoticiaCla.com a priminti aña pasa, nos a extende nos servicio y añadi un seccion Hulandes cu ta practicamente un portal riba su mes. A priminti tambe cu Noticiacla.com lo a lansa su app pa smartphone, y esaki a bira un realidad riba 15 di maart e aña aki. A surpasa mas di mil suscrito caba cu pa e tipo di plataforma na Aruba, ta wordo considera hopi pa Aruba. Y esaki ta aumentando tur dia. A priminti cu ta expande pa mas idioma, y e luna aki ta estrena otro idioma mas. Uzando tur tecnologia posibel, NoticiaCla.com a incorpora e parti di bay 'live' via facebook live stream, y tambe cu uzo di e.o. drone shot, duna e cobertura un angulo mas dimencional. Drone shots a bira un custumber caba pa NoticiaCla.com pa eventonan special, y desde dos luna atras, a añadi e ruman di e drone, esta e Osmo cu tambe a revoluciona cobertura di NoticiaCla.com live sigur pa entre otro cobertura mas profesional di di actividadnan movibel 'live' of graba. Hopi mas uza di video tambe ta un parti integral di e portal aki y el a ricibi su acogida caba. Television 'regular' ya no ta popular mas y live video of graba ta 'the way to go'. Como tal por mira mucho mas di esaki riba e portal aki. Den cuadro di esaki, e luna aki nos ta pidi'bo keda pendiente pa mas proyecto cu ta keda lansa riba e.o. e facebook page di NoticiaCla.com. Despues di un aña y mei, NoticiaCla.com a stop su noticiero merdia na Power FM 101.7 pa cual ta gradici propietarionan di e emisora pa e confiansa brinda na e portal aki. Awor ta preparando un otro proyecto den e direccion ey, pues no ta bay pa largo den 'silencio' riba e tipo di plataforma. Pa loke ta su NoticiaCla su FACEBOOK page, si aña pasa NoticiaCla.com a hera yega 10.000 miembro (no cumpra!), nos por bisa cu awor cu orguyo cu nos a surpasa 15.000 miembro cu ta sigui e portal aki fielmente tur dia, y via nan hendenan ta aumenta esaki pa casi 40.000 cliente mas. Ora cu NoticiaCla.com a priminti di ta mas visibel aña pasa, esaki tambe a bira realidad un luna despues, cu e introduccion di e NoticiaCla.com mobiel, danki na cooperacion y confiansa di Garage Cordia Aruba. NoticiaCla.com ta gradici nan pa e confiansa inmenso pa e bunita mobiel cu a haci e portal aki mucho mas visibel, y tabata instrumental den cierto cobertura. E luna aki, NoticiaCla.com lo estrena mas producto, y manera por mira, tur loke a priminti aña pasa, a sosode tambe. Pues awor atrobe, keda pendiente pa e expansion di producto cu e portal aki ta ofrece. Un biaha mas, masha danki, dank u wel, thank you, pa a haci www.noticiacla.com den apenas 3 aña di tempo, un fuente indispensabel di noticia local y internacional, cu su base na Aruba.