Validez di rijbewijs di Aruba pa cu eleccion ta wordo clarifica otro siman

ORANJESTAD - E rijbewijs 'nobo' di Aruba no ta cumpliendo cu varios rekisito, y como tal no por wordo usa como medio valido pa identificacion. Despues cu NoticiaCla a publica e raportahe e siman aki riba e tema basa riba un entrevista cu presidente saliente di Conseho Supremo Electoral Hubert Maduro, esaki a crea un ola di reaccion. Entre nan, minister di husticia Arthur Dowers a refuta e 'reclamonan' aki indicando cu 'e rijbewijs ta wordo traha bon, cual no tin ningun discusion riba dje'. Informacion cu e portal aki tin sinembargo ta, cu otro siman lo bin cu un comunicado pa clarifica e situacion y ilustra e problema. 

FAYONAN CU TIN 

Entre e fayonan cu tin, ta e hecho cu e informacion no ta acopla na Censo, manera cu e tabata antes. Esey ta nifica cu por tin 'fout' riba e nomber. Y pa ley, e nomber di e persona riba e lista dia di eleccion (na e stemlokaal, mester cuadra cu e nomber riba e metodo di identificacion. Si e ta diferente, e medio di identificacion no ta valido. Tambe tin e material cu cual a traha e rijbewijs. Ley ta bisa cu e mester wordo traha di policarbonaat pero ta traha di material PVC. Ademas ta papia di un diseño riba e portada, cu mester ta den cierto forma segun e ley, pero cu segun informacion cu e portal aki tin, no ta e caso. Tambe e aspectonan di seguridad, no ta mescos cu anterior y cu ta pone cu por falsifica esaki segun e informacion. "Tin duda riba e procedura cu cual e ta wordo fabrica" Maduro a bisa diaranson na e portal aki. "Duda cu nos no tin cu e paspoort y cu e cedula, pasobra eseynan ta sali digitalmente for di e database di Censo. "Ningun hende no ta print y ta bay copi'e despues". Compara cu Censo, den caso di rijbewijs esaki ta wordo haci manual, cu no ta corecto". E declaracion aki pues a causa ola di reaccion den comunidad, cu tambe a keda desmenti pa e mandatario encarga cu e proceso. Intento di e portal aki pa acerca e mandatario riba e tema no tabata exitoso ainda.