Arends: MIO no a cumpli y lo perde su licensia awor!

ORANJESTAD - Gobierno lo inicia e proceso di revoca e licensia di e compania di telecomunicacion MIO mayan, esta diasabra. Minister di Telecomunicacion Richard Arends a confirma na NoticiaCla diabierna atardi laat, cu ningun pago no a drenta y no ta mira cu e ta bay drenta mas tampoco. Como tal, el a duna ok pa cuminsa cu e proceso mayan, cu ta nifica cu MIO ta bay perde su licensia. Si esey ta nifica cu pa mayan caba e clientenan ta bay keda desconecta, e mandatario no por a sigura. Esaki pasobra e no sa con largo e proceso tecnico lo tuma. Su preocupacion aworaki ta e trahadonan cu ta keda sin trabou y e clientenan cu lo keda desconecta. 

E SITUACION TE CU AWE

Tabata dos dia pasa cu e portal aki a raporta caba cu e  e 'ultimatum' di gobierno pa e compania di telecomunicacion MIO cumpli cu pago pendiente, lo a vence awe diabierna. "Y si gobierno no ricibi e pago corespondiente pa dia 30 di juni (aki dos dia), e siguiente dia (1 juli) gobierno ta revoca e licensia di e compania, lagando 6 mil cliente sin comunicacion". E mandatario di telecomunicacion Richard Arends a confirma diaranson mainta ainda pa NoticiaCla cu nan no a ricibi ningun pago e momento ey. "Nos ta keda hopeful semper, pasobra con cu bay bin, e ta un empresa y gobierno no t'ey pa kibra ningun empresa" Arends a bisa. Mes momento e ta exigi si pa tur compania (di telecom den e caso aki) cumpli. MIO, cu a kibra su silencio den un reaccion cortico pa e portal aki awe, a mustra cu nan' a scoge pa keda respetuosamente keto durante e tempo di tension politico aki, no obstante declaracionan publico haci riba nos organisacion'. 

GOBIERNO SU PENSAMENTO 

Arends a repasa e situacion di proveedornan di compania celular cu ta tres, (Setar, Digicel y MIO). "Un di nan no ta cumpliendo ya pa algun aña caba. Esaki no ta nobo, sino un 'procedure' cu a wordo encamina un aña pasa" Arends a bisa, refiriendo na e decreto firma cu ta autorisa gobierno pa revoca e licensia di e compania si e no cumpli. A menciona varios caso den corte cu tabata na fabor di gobierno. "Ainda gobierno tabata hopi lenient" Arends a sigui bisa. Na comienso di e aña aki, gobierno a bolbe duna MIO 6 luna di tempo pa nan cumpli cu nan obligacionan financiero. "Nan tin te dia 30 (di juni)  pa paga. Si nan paga dia 30, e revocacion no ta drenta na vigor". A haci pregunta cu si haya peticion e siman aki pa duna un tempo extra, si ta considera esaki. Arends a bisa cu esaki no ta posibel y cu nan ultimo fecha pa paga ta 30 di juni. 

EFECTO PA CLIENTE DESPUES DI 30 JUNI

Si MIO no a cumpli y e licensia keda revoca, teoreticamente segun e mandatario, esey lo a significa cu e dia despues e clientenan di MIO lo no tin coneccion mas di servicio di telefon celular. Pero diabierna a mustra cu ni sa sigur si esey por sosode caba diasabra.  "Nos ta wakiendo cu DTZ (Directie Telecomunicatie Zaken) kico ta e miho moda (pa atende esaki). Mi no ta haya cu e cliente mester ta e dupe ora cu un provider no cumpli cu su obligacionnan."  Cu esaki, Arends ta referi na e posibilidad pa e clientenan por haci algo cu SETAR y Digicel pa tuma esaki over eventualmente. Gobierno tambe ta purbando pa wak di ki otro forma lo por acomoda e clientenan perhudica. "Nos ta wakiendo e posibilidadnan tecnico si esey por". E mandatario no kier crea un precedente tampoco. 

LEYNAN TEY Y NO POR CAMBIA NAN

E mandatario a mustra cu e keho di MIO ta comprendibel, pero cu tin ley cu mester cumpli cu ne. Segun Arends, punto di MIO ta cu nan ta un compania chikito y cu nan no por 'afford' e suma miyonario anual cu nan tin cu paga. "Pero e tarifanan pa loke ta trata mobile service providers, ta un vaste bedrag. Thats the cost of doing business pa esey" Arends a bisa. A bisa cu Setar ni Digicel no ta paga e suma cu placer. E tarifa no ta funciona asina cu si bo ta mas chikito, bo ta paga menos. E tarifanan ta fiho. 

SITUACION HOPI STRAÑO

E mandatario a admiti cu e situacion cu MIO ta uno hopi straño. "Honestamente mi ta hay'e hopi straño. Nos a comunica hopi biaha cu MIO. Nan ta basa nan mes cu nan ta un empresa cu no por afford e suma ey. Mi ta compronde esey, pero no ta algo cu mi por haci algo erover. E ta stipula pa ley y ta cada 10 aña e suma ey mester wordo paga" Arends a finalisa bisando. 

REACCION MIO

Den un reaccion cortico y inusual, MIO a kibra nan silencio brevemente pa splica por escrito na e portal aki awe, algun punto crucial pa nan. Entre nan, cu pa e ultimo 7 añanan nan (MIO) a haci tur lo posibel den nan poder pa provee un servicio extraordinario y na un prijs competitivo. Nan a considera nan mes como huesped na Aruba (compania cu a nace di inversion Mericano). Y teniendo e hospitalidad na cuenta, nan a opta pa "keda den un silencio respetuoso durante e tempo di tension politico, no obstante declaracionan publico referente den nan direccion y e compania". Nan a mustra mesora tambe cu nan "por ta forsa si pa papia publicamente si, y ora cu gobierno di Aruba dicidi di tuma accion" contra nan. Nan ta splica cu nan ta un compania di telecomunicacion cu 6 mil cliente. Mientrastanto nan no ta duna comentario riba e discusion recien incluyendo accionnan menasante cu lo por ta sin predente, y cu por potencialmente laga clientenan sin comunicacion critico, incluyendo comunicacion di emergencia. "Nos ta spera cu nos posicion di restriccion y respect pa e proceso politico den un pais exterior, por wordo respeta pa prensa. Te ora cu nos haya nos forsa di otro forma, MIO lo continua sirbi e pueblo di Aruba na e miho abilidad posibel, y provee e tarifanan husto disponibel riba e isla" e comunicado a finalisa bisando diaranson.