Un grupo di amigo ta reparti premio miyonario di Lotto

ORANJESTAD - Un grupo di por lo menos 20 persona lo reparti e premio miyonario di AWG 2.450.000,=. Awe mainta e otro parti di e premio total a wordo colecta. Manera ta conoci, 2 persona a gana premio oficialmente. Pero a resulta awe mainta cu e grupo aki ta mas grandi. Ta 5 miembro di e grupo a bin colecta e dos checknan grandi. Algun di nan sa kico nan ta bay haci cu e placa, mientras cu otronan ta warda wak prome cuanto tur ta haya exactamente ora e keda reparti. Pa loke ta lotto mes, Damaris Ridderstap, ta contento cu e forma con esaki a bay. E ta contento di mira con e premio no a haci solamente un persona contento, sino henter un grupo.