E problema di MIO: No tin 'level playing field' pa competi

ORANJESTAD - 'E montante ku Gobierno kier cobra e compania di telecomuncacion MIO pa su concesion ta mucho halto, e no ta make sense'. Asina NoticiaCla a haya comentario di un experto riba e tereno durante un investigacion cu e portal aki a haci. Un dia prome, minister di Telecomunicacion Richard Arends a confirma pa e portal aki cu enberdad MIO a admiti cu nan tin problema cu e prijs cu ta pidi pa e concesion y cu e compania ta mucho chikito. Y investigacion di e portal aki ta duna mas luz riba e situacion y kico por ta e origen di e problema. Asina ta haya un bon bista cu cos ta mas 'complica' cu ta kere. 

TECNOLOGIA NOBO TA REKERI INVERSION CUANTIOSO

Cu e cambio den technologia y e inversionan nobo cu constantemente mester haci, e situacion di operacion pa MIO no ta parce di ta viabel. Un provider (manera MIO) lo mester tin por lo menos 20 mil plus cliente pa por sobrevivi e negoshi. E competencia den e caso aki cu ta e.o.Setar tin e bentaha, y MIO lo no por sobrevivi cu menos di 10mil cliente. E compania mes a confirma diaranson cu nan tin 'apenas' 6 mil cliente.  

NO TIN LEVEL PLAYING FIELD

Cu tur e loke a presenta ta mustra pues cu e 'level playing field' (situacion igual pa competencia husto) cu e minister ta referi na dje no t'ey. E portal aki a compronde cu na Corsou p.e. e providor ta paga un suma pa cada subscriber (cliente), pues no un 'suma adelanta' cu a wordu calcula unilateral sin input di e stakeholdersnan mes. Si e gastonan y inversion ta mucho halto pa por 'break even' of haci ganashi, e unico opcion ta keda pa cera e compania of yega na un otro formula pa paga e 'derecho di concecion'. Na final di cuenta, manera cu MIO a bisa tambe, ta e cliente ta esun cu ta wordo perhudica paso e competencia cu ta necesario den nos mercado lo no t'ey mas.

E HISTORIA DI MIO

Investigacion cu e portal aki a haci, ta mustra cu e historia di MIO ta bay bek te na 2004. Na 2004 MIO a gana e destaho publico of beauty contest pa haya e di 3 licensia/concesion pa ofrece servicionan di telecommunicacion na Aruba. E grupo ku a gana e 'bid' tabata consisti di Curacao Telecom”CT” y un partner local. E mesun grupo ey  a kibra e monopolio di Telecommunicacion na Corsou den Corte “uitspraak Polycom”. Actual parlamentario Andin Bikker (di bufete  Gomez & Bikker) a hasi uso di e sentencia aki e tempoe ey pa kibra e monopolio di telecomunicacion na Aruba y a haya e di 2 concession “New Millenium” cu awor ta opera como Digicel na Aruba.

OBLIGA PA BENDE SU ACCIONAN CU MIO

Ora ku Digicel International a Cumpra CT na Corsou, un situation a surgi cu Digicel tawatin accion (shares) den dos compania di Telecommuniocation na Aruba cual no ta posibel bou di e reglanan di concesion na Aruba. Digicel e ora ei a wordu obliga di bende su accionan den MIO cu un tercer partido. Un 80% di e accionan a wordo bendi na un grupo Americano EOCG Capital Group y 20% di e actionan a keda den posesion di e socio local. PWC Curacao a hasi un due diligence cu resultado positivo riba e grupo Mericano aki, pero cu despues a resulta di tawatin mal intentionan den nan forma di haci negoci riba e islanan.

WIRELESS BROADBAND

Bou di maneho di e partner local MIO a logra di lansa Wireless Broadband promer ku Setar y Digicel na Aruba y a crea un producto sumamente exitoso. Tambe MIO a logra di obtene 'preferred roaming status' cu e compania di cellular mas grandi di USA Verizon y Sprint. Esaki tawata un contract exclusivo cu tur e turistanan di Merca durante nan estadia na Aruba cu tawata usa e red di MIO exclusivamente. Esaki tawata e entrada di mas grandi y di mas importante pa MIO e tempo ei. 

PROBLEMA FINANCIERO DI ACCIONISTA

Ora ku e accionista mericano EOCG a haya problema Cu un fondo di capital priva New York nan a pasa pa benta di e 80% di e actionnan na un supuesto vindishi. Den e statutonan di e compania tin un articulo “Blokkeringsregeling” cu ta nifica cu e 80% mester wordo ofreci na e acionista minoritario cu tawata 'willing and able' pa cumpra e aciona promer bai over na benta pa un tercer partido. E ora ey e acionista local a cuminsa un caso pa para e findishi/benta di e accionan.  "Pero e hues a opta pa no sigui ley y a ignora e blokkeringsregeling y asina actionan a wordo bendi na un otro compania Mericano" a wordo bisa e tempo ey.

BON INTENCION PERO PROBLEMA NA CAMINDA

E compania Mericano cu a tuma MIO over a sigui cu e operacionan na Aruba cu tur bon intencion sin sa kico tawata spera nan. Den un temporada hopi cortico despues MIO a perde nan entrada di mas grandi, cu tawata e Verizon roaming cu a bay pa Digicel y despues di dos luna pa Setar. 

SERVICIO DI VOZ DEN MERCADO SATURA

"MIO a logra di lansa servicionan di voz, pero den un mercado satura y cu supuesto competencia inhusto y un regulator cu no ta completamente imparcial esaki ta hopi dificil" e portal aki a compronde di expertonan riba e materia. Den a añanan cku a transcuri, e modelo di negoshi di un mobile operator a cambia masha hopi. Entre otro Whatsapp y Skype a hasi su entrada na  mundo y ta practikamente eliminando local i international voice traffic revenue. Hasta director di SETAR Roland Croes a admiti durante un evento comercial na comienso di aña, cu un di e enemigonan mas grandi di SETAR ta whatsapp. Hubentud casi no ta uza voice sino data. Y pa data, esaki mester pasa via di Setar cu tin monopolio riba e area aki. Asina pues, ta splica con e situacion pa MIO ta uno dificil pa opera bou di circumstancianan actual comercial.