Sin ayudo, fundacion SABA ta failliet aki 6 luna

ORANJESTAD – E fundacion cu ta encarga cu cuido di nos grandinan, esta Stichting Algemene Bejaardenzorg Aruba (SABA) no ta pasando den su miho momentonan. Y si pa aki 6 luna SABA no haya un cierto cantidad di placa, nan lo mester bati bancarota, cu tur consecuencia pa e trahadonan y esnan cu nan tin cuida. Y declaracionnan haci diadomingo ultimo pa e director di e fundacion, Hans Rokebrand, no a cay den bon tera serca e minister encarga cu e departamento aki. E hecho cu e director a entrega su retiro tambe, sin duna motibo tambe no ta facilita e situacion.

E director a yama famianan diadomingo ultimo pa splica nan e situacion cu nan ta aden, segun e director. Cu un total di 310 trahado, pa cual tin 16 vacatura, y un total di 300 pashent, SABA tin un problema serio di likides. Di e presupuesto total. 74% ta bay na salario y otro gastonan di personal. Algo cu segun Rokebrand, SABA no tin control ariba pasobra esaki ta bay directamente pa e trahadonan, y ta wordo paga directamente via dept di finanzas. Cada pashent ta costa SABA por lo menos 4000 florin pa luna. Multiplica esaki cu e 300 pashent, ta yega lihe na 1.2 miyon florin pa luna solamente na pashent. Acerca tin cu bin e otro gastonan.

E otro parti di e presupuesto, ta na gastonan manera awa, coriente, telefon, seguro, cuminda y mas. E hecho cu gobierno a corta 10% den subsidio, no ta yuda e fundacion tampoco. E 10% aki ta traduci den e suma di 24.000 florin pa luna. Y como tal SABA a cuminsa aplica medida di austeridad manera cuminda, coy bebe, menos luz (unda cu no tin hende) , paga airco y areanan di recreacion. E placa menciona di 24.000 pa luna, ta necesario pa e por keda na bida, sino e reserva di SABA por caba aki 6 luna. Un peticion cu e director a haci diadomingo na e famianan, ta pa cuminsa subsidia nan propio famia eynan, cu sea 25 florin extra pa coriente y 15 pa laundry.

Pues e situacion segun Rokebrand, no ta nada positivo y mester di atencion. Interesante ta cu e director di SABA mientrastanto a entrega su retiro, pero no a bisa pakico e la haci tal. Ta keda na gobierno pa mira kico por haci, siendo cu gobierno, segun statuut, no tin absolutamente nada di bisa den e fundacion. Algo peculiar mirando cu gobierno ta esun cu mas ta subsidia e fundacion aki.