Supervision financiero si, pero den forma di begrotingskamer

DEN HAAG/ ORANJESTAD - E declaracion di presidente saliente di colegio di supervision financiero, Age Bakker, esta cu nos islanan mester mantene e supervision financiero den futuro, a haya oido. Mayoria di politiconan activo ta di acuerdo, pero no e forma con Bakker kier pa e sigui. Gobierno a bisa NoticiaCla cu e ta opta pa no reacciona riba e declaracion di Bakker.  Lidernan di oposicion Evelyn Wever y Andin Bikker ta pro continuacion di supervision, pero bou di un propio 'begrotingskamer' osea un camber presupuestario. Lider di su propio fraccion (ainda) Marisol Lopez ta parcialmente di acuerdo cu Bakker.  

DECLARACION DI BAKKER

Bakker su declaracion ta uno na e corant financiero Hulandes FD (Financieel Dagblad) na final di su termino di 6 aña como presidente di C(A)Ft. Segun e economista Hulandes, supervision financiero ta haci e situacion pa inversion mas atrativo y ta disminui e risico cu Hulanda mester carga gasto pa mal maneho financiero. "E combinacion di recompensa pa bon comportacion (wortel en stok)  ta yuda" Bakker a bisa. Cu esaki e ta referi na e hecho cu si e islanan (Aruba ainda falta) comporta nan mes bon riba tereno financiero, nan ta wordo recompensa pa Hulanda cu prestamo barata den exterior. Un promesa cu ta data for di tempo di e 'acuerdo di diahuebs santo'  na 2013. Ademas, e dicho 'stok' ta referi tambe na e hecho cu supervision financiero tin poder cu e por duna 'instruccion'. 

REACCION POLITICO DI ARUBA

"Cu salida di Age Bakker for di CAft mi dialogo cu ne tambe a termina, pues mi no ta continua esaki pa medio di prensa". Asina minister di finanza Angel Bermudez a reacciona brevemente pa NoticiaCla. E ta mas interesa awor pa dialoga cu e hefe nobo. "Nos tin hopi trabou y topico pa dialoga cu su sucesor Prof dr. Gradus, entre otro, cuenta anual 2016, Presupuesto 2018, UR-2e kwartaal etc." Bermudez a bisa brevemente. Lider di fraccion di MEP Evelyn Wever Croes ta mustra cu e ta pro, pero cu nos propio 'begrotingskamer'. "Nos di MEP ta kere den supervision. Ami ta kere cu supervision ta importante. Nos a demonstra tambe cu sin supervision nos no por maneha e pais aki debidamente" Wever a cuminsa na bisa. Un supervision permanente ta ok, pero no e manera cu e ta aworaki. "Esta cu ta otro ta bin haci'e pa nos. Nos mes mester haci'e le". E ta papia cu e por ta un Raad van Advies of un begrotingskamer separa. Pero e organo mester tin e djentenan pa por haci control real y mara gobierno na e consecuencianan si e supervision resulta cu e no a bay bon. Andin Bikker ta mustra cu e tambe ta pro un begrotings kamer. A referi na e hecho cu tabatin un consenso den parlamento pa un begrotingskamer, esta nos propio tipo di CFT. "Den mi concepto, ora cu bo yega na e normanan cu ta hinca den ley di CFT, e ora bo mester reemplas'e cu un begrotingskamer" Bikker a bisa. Bo por yena e camber cu expertonan tambe di Hulanda, pero e ta keda un instituto autonomo di Aruba. Por lo menos segun Bikker. Marisol Lopez cu ta su propio fraccion a uza un dicho pa splica su reaccion. E ta di acuerdo cu Bakker, pero 'te awor ta stok so Aruba a haya, nada di wortel", refiriendo na e dicho hulandes cu Bakker a uza den su declaracion, ,,De combinatie van wortel en stok helpt'', refiriendo na e hecho cu si bo presta bon, bo ta wordo recompensa. E recompensa, segun Lopez, no a bin ainda di parti di Hulanda. Foto ta cortesiai di Gobierno durante reunion entre CAFT y Gobierno di Aruba siman pasa.