Arends: Regulacion pa radionan pa programa politico no a cambia

ORANJESTAD - Gobierno a tuma nota di e carta di DTZ (Directie Telecomunicatie Zaken) relaciona cu e reglanan di transmision pa partidonan politico den e periodo di eleccion. De hecho, nada no a cambia cu e ley, Richard Arends cu ta minister di Telecomunicacion a sigura NoticiaCla awe mainta. E carta cu a keda entrega siman pasa na tur partido politico door di DTZ, a crea un ola di reaccion cerca varios partido politico, unda cu tin algun cu a bay asina leu di yama esaki dictadura, y censura. Sinembargo e mandatario a sigura cu e carta no ta nada nobo ni straño. Ta un carta cu tur tempo di eleccion ta wordo manda, y cu ta regla e tempo di transmision politico pa e periodo aki. De hecho ta un ley, y e mandatario ta simplemente tene su mes na esaki. 

ZEND TIJD POLITIEKE PARTIJEN

E carta ta conforme un ley cu ta bieu si, y cu ta regula pa por duna tur partido politico un tempo igual pa manda nan mensahe y opinion. "E no ta un maneho nobo." Ta e mesun carta cu a sali na 2001, 2005, 2009, 2013 y awor na 2017. Un standard procedure" e mandatario a sigui bisa. Solamente e biaha aki e carta ta uno mas amplio cu ta duna pues splicacion amplio kico e articulonan ta cu nan ta basa nan mes. 

LEY ANTICUA

E keho cu ta un ley anticua, no ta nada nobo. E ta un ley existente, y si e ta anticua of no, e ta e ley existente cu tin cu mantene nos mes na dje segun e mandatario, pa sigura bon orden pa un periodo electoral. Arends ademas ta mustra cu nunca e carta aki no tabata un 'issue', y ta mas bien un problema pa partidonan politico nobo. Esaki pasobra e ley ta stipula cu ta partidonan cu tin representacion den parlamento so tin derecho di tin tempo di transmision den principio den temporada di eleccion. Despues di postulacion como candidato, cu e gruponan politico pasa e drempel cu nan por participa den eleccion (despues di entrega di lista), nan ta wordo considera como un partido politico oficial y ta participa conforme e ley menciona. Y no a cambia nada y no ta bay cambia nada na DTZ.