Minister ta tuma director di SABA na malo

ORANJESTAD – Director di e Stichting Algemene Bejaardenzorg Aruba (SABA) Hans Rokebrand, ta hungando politica. Minister di Salud, responsabel pa e departamento aki, Alex Schwengle no tabatin niun palabra bunita pa e director aki. “Mi no ta contento cune” e mandatario a sigura NoticiaCla.com diamars mainta, como reaccion riba e reunion cu e director a tene diadomingo ultimo cu e famianan di esnan cu ta keda na e casnan na SABA. E mandatario a admiti cu a corta 10% den subsidio di SABA, pero den asuntonan material, pero no cuminda of salario.

Ora cu e la tende kico e director a haci, e la mustra su disgusto y e actuacion aki no tabata uno corecto pa un director di un instancia asina haci. Segun Schwengle, ‘nunca di su bida e mester a bay afo bisa cu ta corta placa di nos grandinan’. “Bo no tin ningun credibilidad como director di e organo” e mandatario a sigui bisa. “Mi ta tuma e director na malo”, e minister a sigui bisa NoticiaCla.com.

Ora cu a corta den subsidio berdad, a haci esaki pa parti di material. Aki ta unda cu e director mester a bay busca alternativa pa yega na un solucion miho. Y si e mester di ayudo, gobierno lo por a yude. “A corta berdad, pero den material, no cuminda. Si tin problema, mester por sinta combersa. No por corta den cuminda pa e ancianonan. Esaki ta algo inaceptable” Schwengle a sigui bisa. E situacion no ta di gaba, pa cual mester a mara faha. “Pero no pa mata hende! Pa pone un grandi sufri, no por!” e mandatario a sigui bisa.

E situacion di SABA no ta uno nobo y tin atencion di gobierno, segun Schwengle. Loke tine precupa, ta e structura actual di SABA, unda cu ta subsidia, pero no tin nada di bisa den e maneho. Esey no por segun e mandatario. Eynan kier bay haci algo y lo papia proximamente cu e director y e Hunta di Supervision di e fundacion. E problema na Aruba ta cu cuido pa anciano enberdad ta caro. Gobierno como tal no por carga e gastonan aki manera cu e structura actual ta. “Si nos hinca tur nos grandinan den SABA, nos ta bay failliet. Nos no por afford e” e mandatario ta admiti. “Nos no tin suficiente fuente pa financia esaki”. E intencion di gobierno ta pa otro aña bin cu un asina yama “ Plataforma Ouderzorg Aruba” unda cu lo bin cu un tipo di programa piloto cu nan yama Community Based Rehabilitation. E plan ta pa cuida bo grandinan den comunidad mes, cu ta uno mas barata y practico.