Habitantenan cu caso contra doño dump ilegal na Tamarijn/Seroe Lopes

TAMARIJN - E situacion di dump ilegal na Tamarijn ta sigui un problema. Como tal habitantenan di Seroe Lopes a dicidi pa no warda mas y aserca Ministerio Publico cu un peticion pa persigui e doño di tereno. Tambe a ta pidi minister y Cuerpo Policial Aruba pa continua nan esfuersonan pa yega na un solucion duradero pa e bario y futuro sano pa e famianan. Durante un conferencia di prensa diamars, a elabora riba e problematica di e bario. 

HABITANTENAN FADA

Segun e habitantenan Luc Alofs y Fabia Croes, Aruba conoce mas of menos 35 dump ilegal. Mirando e peliger pa e salud di nos y nos yuinan, pa nos flora y fauna, habitantenan di Seroe Lopes a dicidi pa no warda mas y aserca Ministerio Publico cu un peticion pa persigui e dono di tereno. Tambe a pidi minister y Cuerpo Policial Aruba pa continua nan esfuersonan pa yega na un solucion duradero pa e bario y futuro sano pa e famianan. 

CANDELA ATROBE

Diabierna atardi, 23 di juni, e dump ilegal di Tamarijn/Seroe Lopes tabata na candela atrobe. Huma a sali henter merdia for di tera. E dump aki ta causa molester serio pa e habitantenan di bario Tamarijn/Seroe casi binti aña caba. E prome protesta formal a tuma lugar na aña 2001 ora habitantenan a firma un peticion. Na ana 2010 mesun cos a sosode, atrobe sin resultado duradero. 

CANDELA NA 2012

Na 2012, otro candela na e dump a resulta na formacion di un grupo di trabao ministerial. Nan a formula un maneho nobo yama Cero Tolerancia pa control riba dumpmento ilegal. A desaroya instrumentnan  pa ehecuta e maneho y cera dumpnan ilegal. A stipula multa pa diferente tiponan di dumpmento ilegal. Tambe a forma un grupo di trabou pa sigura e efectividad di e maneho. 

PROBLEMA NA APRIL 2017

Dia 3 di april e aña aki, un candela fuerte a tuma lugar na e mesun dump. Un bes mas habitantenan a acerca polis y gobierno. Durante un town hall meeting cu entre otro minister di Husticia y polis a palabra cu minister lo busca solucion y wak con por yena e dump na un manera controla, sigur y sano, manera den pasado tabata e caso na algun otro dumps. Polis lo a hiba e caso pa Ministerio Publico.

CASO SUMARIO

Actualmente, tin un caso sumario andando contra doño di e tereno na Corte di Prome Instancia. Abogadonan di ambos partido keto bay ta negocia pa yega na un acuerdo.  Mientrastanto, lamentablemente e dump di Tamarijn/Seroe Lopes keto bay ta causa problemanan serio. Te awo, e dump no ta yena y keto bay holo ta drenta casnan, causando problema di garganta etc. Diabierna 23 di juni huma a cuminsa sali un biaha mas for di e dump. Despues di 20 aña di dumpmento sin control, e huma probablemente ta toxico. Despues di dos luna y mey, mester constata cu gran parti di e dump ainda no ta yena manera priminti. Ministerio Publico ainda no a ricibi rapport di polis.