Premier Eman ta contraaresta declaracion di Hulanda riba binimento di CFT

ORANJESTAD – E comision cu ta bin investiga e presupuesto di Aruba e siman cu ta bin, no ta College Financieel Toezicht (CFT). Por lo menos esey Premier Mike Eman a sigura NoticiaCla durante un encuentro cu prensa diadomingo ultimo. E hecho cu su colega minister hulandes Ronald Plasterk si ta referi na e comision CFT, ta keda pe. “Nos ta hopi cla den esey” Eman a cuminsa na bisa. “No ta un CFT ta bin Aruba. Nos a bisa den e acuerdo cu expertonan tanto di Aruba como di Hulanda lo haci e trabou” . Eman ta pensa cu si Hulanda kier scohe hendenan for di CFT of sociale zaken of plan bureau, ta nan bon derecho pa haci tal. “Pero no ta e instituto of organisacion CFT ta bin na Aruba. Absolutamente cu no” Eman a ripiti na NoticiaCla na mas cu un occasion diadomingo anochi.

 E ta mustra cu e acuerdo di siman pasa pa controla presupuesto, ta un acuerdo basa riba boluntad propio. Y cada pais ta dicidi ken nan kier pone den e comision. Si tin un of dos hende di CFT tambe, ta nan bon derecho. “Esey no kier men cu e instituto CFT manera cu nos conoce, ta bin haci e investigacion aki” Eman a bisa. Riba insistencia di NoticiaCla y mas periodista e ora, a recorda Eman e momento ey cu ta minister Plasterk mes a bisa cu ta CFT mes ta bin investiga, y no a splica cu ta parti di CFT so. Aki Eman a bai na defensa straño indicando un asunto diferente, bisando cu den pasado Plasterk no a duna indicacion na gobernador y e dia siguiente ta tende cu ta sostene gobernador.