Bakker: Gobierno di Aruba a tuma 20 hende extra na trabou e aña aki

ORANJESTAD - Gobierno a tuma 20 hende extra na trabou e aña aki. Esaki e ta considera e aumento barbaro cu ta haci mencion di dje den nan rapport reciente, cu minister di finanza di Aruba ta refuta. Asina ela bisa NoticiaCla recientemente durante un conferencia di prensa. No obstante tur e discusion aki, Bakker ta sigura cu no tin diferencia di opinion entre e cu e minister. Por lo menos, den su interpretacion. "Nos ta totalmente di acuerdo cu otro" ta palabra di presidente saliente di e colegio di supervision financiero di Aruba Age Bakker na Noticiacla recientemente. Bakker kier a clarifica cu no tin diferencia di opinion entre e y e mandatario riba e.o. e aumento barbaro di personal di gobierno den 2017. Algo cu Bermudez a refuta anteriormente na e portal aki, cuestionando CAft su fuente di informacion cu tabata alega cu 'tin un aumento barbaro' di personal e aña aki. Bakker a dicidi e ora, riba insistencia di e portal aki, pa bira mas concreto.

BAKKER CONCRETO RIBA DECLARACION

Bakker a te hasta cita palabra di Bermudez, cuminsando na bisa, "Minister Bermudez a bisa, mi ta bira awor hopi concreto, si bo compara e prome cuartal di e aña aki cu e prome cuartal di aña pasa tin dos trahado menos trahando. Claro. Den esey e tin rason" Bakker a bisa. "No tin ningun diferencia di opinion riba esey. Mi no kier drenta den un discusion aki riba" Bakker a bisa. "E asunto ta hopi simpel. Tin cuater cuartal den un aña. Loke cu mi a bisabo aworey, ta cu den curso di aña 2016 bo ta mira cada cuartal e cantidad di ambtenaar reduci. Di cuartal pa cuartal" Bakker a sigui bisa. "Loke bo ta mira den e prome cuartal di e aña aki, cu tin 20 ambtenaar a wordo tuma na trabou. Imaginabo si tabata 0. E ora minister Bermudez por a bisa, awor nos tin 22 menos cu aña pasa. Pero pasobra tin 22 persona cu a wordo tuma na trabou, e ta kibra un tendencia y bo no kier pa e trend continua. Nos ta papiando di e mesun cifras" Bakker a finalisa bisando. 

BERMUDEZ SU REFUTACION RIBA CAFT

E 'discusion' a cuminsa luna pasa ora cu CAFT a publica su reaccion riba e rapport di prome cuartal di gobierno riba nan maneho, unda cu e colegio a bisa cu gobierno a tuma considerablemente mas hende den servicio. Bermudez a refuta esaki na e portal aki bisando mesora cu esey no ta cuadra.   Den su prome reaccion riba e tema pa NoticiaCla e a haya e argumento uza, ‘no corecto’. Bermudez ta referi na e rapport riba pagina 27, cu ta mustra cu e prome cuartal, e cantidad di empleadonan cu gobierno tin, ta mas abou compara cu aña pasa. “Mi no sa ki fuente nan ta uza” Bermudez a bisa e portal aki, indicando cu e fuente ey no ta bon.

CAFT TA GAÑA?

Mustrando cifra, e ta papia di cu e prome cuartal 2016, gobierno tabatin 3871 hende compara cu prome cuartal 2017, unda cu tabatin 3869, esta 2 hende menos. Ora cu NoticiaCla a puntra Bermudez si CAft ta gaña anto, e mandatario a bisa “Mi no ta bisa cu nan ta gaña. Mi ta bisabo cu e prome cuartal 2017 ta mas abou cu aña pasa. Anto e ora mi ta puntra, unda bo ta conclui cu tin un aumento barbaro di e cantidad di empleado” Bermudez a bisa. Ora cu a puntra e mandatario si e informacion e ora ey no ta berdad ela bay di acuerdo. “E no ta berdad!” E ta sigura cu e maneho di gobierno keto bay ta pa reduci e cantidad di empleado. E no sa ki fuente ta wordo uza, pero e sa cu no tin un aumento barbaro.

REACCION DI CAFT  RIBA BERMUDEZ

Ora cu e colegio a tene nan conferencia di prensa diabierna siman pasa, e portal aki a confronta e colegio cu e declaracion aki di e mandatario. Aki, Bakker a bisa e portal aki cu e 'informacionan cu e colegio di supervision financiero di Aruba a publica recientemente di e reacion riba publicacion di prome cuartal, ta cifranan cu nan a haya di e propio ministerio di finanza, exclusivamente'. Bakker a bisa di tambe a mira e discusion aki y ta kere cu ta importante 'pa nos mantene nos mes na e hechosnan'. 

HECHOS SEGUN BAKKER

Ora Bakker a papia di 'hechos', e ta referi na e propio presupuesto di gobierno cu ta haci mencion cu cobransa di loonbelasting lo aumenta cu 19% e aña aki. "E ta un aumento barbaro, debi na e 'compliance'. Nos ta mira cu den e prome cuartal e aumento ta apenas 6% y no 19%. Esey ta nifica cu den e proximo cuartalnan mester traha hopi duro pa yega e promedio di 19%" Bakker a cuminsa. A cuestiona Bakker riba esaki mustrando cu ta conciente cu gobierno ta bisa claramentee cu e cifra di 19% ta pa henter aña, y cu ta apenas 1 cuartal ta wordo raporta awor. Pues ta logico cu nunca e 19% menciona, por wordo logra den apenas un cuartal. Bakker riba esey a admiti e ora cu esey por ta berdad, pero cu experiencia ta mustra otro. Y cu ta netamente e experiencia ey ta mustra cu ta kere cu gobierno ta bay logra yega e cifra aki, y ta p'esey ta haci mencion di dje awor. Pa loke ta BBO tambe ta papia den presupuesto di aumento di 33%. Aki tambe Bakker ta mustra cu tin apenas 10% di aumento. "Leu di e cifra menciona. Those are the facts. Loke nos ta mira ta cu den e prome cuartal no ta wordo realisa cu loke ta wordo presupuesto pa henter e aña" Bakker a bisa. E ta menciona mesora si cu e ta spera cu den e proximo cuartal esaki mehora. Scucha e entrevista AKI.