Maduro: Uzo di rijbewijs como identificacion pa votamento ta na peliger

ORANJESTAD - "E uzo di rijbewijs como identificacion pa votamento ta na peliger". Asina presidente di Conseho Supremo Electoral Hubert Maduro a bisa NoticiaCla dialuna. Como tal, tin posibilidad cu no por bay uza rijbewijs como identificacion valido pa e proximo eleccion. Presidente di Conseho Supremo Electoral Hubert Maduro a splica NoticiaCla cu tin un problema riba e caso. "Nos tin masha aña cu problema cu e rijbewijs" Maduro a bisa. "Tin duda riba e procedura cu cual e ta wordo fabrica" Maduro a bisa. "Duda cu nos no tin cu e paspoort y cu e cedula, pasobra eseynan ta sali digitalmente for di e database di Censo. "Ningun hende no ta print y ta bay copi'e despues". Compara cu Censo, den caso di rijbewijs esaki ta wordo haci manual, cu no ta corecto."

VALIDEZ RIJBEWIJS NA DUDA

"Mi tin miedo cu lo por tin un percentahe di erornan" Maduro a bisa. "Aworakinan e motibo pa no acepta ta, cu e rijbewijs no ta cumpli cu ley tampoco. Nos tin ley locual un rijbewijs mester wordo traha. Anto e no ta cumpli completamente cu ne" Maduro a sigui bisa e portal aki. "Lagami bis'e asina akinan. E uzo di rijbewijs como identificacion pa votamento ta na peliger" Maduro a sigui bisa. Cu e por wordo rectifica ainda, mi no sa, pero e ta na peliger. "Di otro banda, cedula por wordo haya hopi lihe. Bo por haya un cedula mas liher cu bo por haya un rijbewijs" Maduro a sigui bisa. Scucha e entrevista AKI.