Tension y luto den parlamento

ORANJESTAD – Tension y na luto ta e sentimento cu a describi e ambiente den parlamento diamars na occasion di apertura di e anja parlamentario nobo. “Bo por a sintie tambe” presidente di sindicato FTA Rudy Geerman a comenta na NoticiaCla.com despues di e ceremonia. Geerman tabata un di e invitadonan durante e apertura di e anja parlamentario. “Mas hende a comenta esey awe. Bo por a sinti e tension”. Loke a hala hopi atencion tabata e hecho cu e fraccion completo (cu excepcion di presidente di parlamento) a bisti na preto, demonstrando asina nan sentimento di luto. “Enberdad e tin di haber cu loke a pasa den parlamento ultimo tempo” Chris Dammers a confirma na NoticiaCla.com diamars mainta.

Segun Dammers su splicacion, esaki ta e prome biaha cu e fraccion publicamente ta ‘protesta’ contra e trato cu nan a haya di gobernador y gobierno Hulandes pa no a firma e presupuesto. “Nos no a manda carta of bisa algo como fraccion” Dammers a sigui bisa. Como tal a opta pa bisti na preto den forma di protesta y luto. Notable tabata sinembargo cu ora cu a para pa saca potret hunto, colega parlamentario Marlon Sneek a nenga di para hunto cu e grupo pa saca un potret. No por a haya sa kico e motibo ta di Sneek su rechaso pa saca potret. Repetidamente lider di fraccion Rene Herde a yame, pero Sneek cada bes tabata mustra cu e no ta interesa pa saca un potret asina.

E sindicalista Geerman a mustra cu por a sinti e tension den sala for di momento di drenta. “Si antes nan tabata sinta tur caminda, a opta e biaha aki pa sinta separa. Pues fraccion di AVP a sinta nan so apart, enves di sinta cu oposicion” Geerman a bisa. Tambe Geerman a nota cu e discurso di gobernador interino tabata tambe diferente. “E no kier a bay den profundo” Geerman a bisa, refiriendo na e problemanan cu ta andando e ultimo lunanan aki.

E protesta den e fraccion berde no a keda na sala di parlamento sino a continua pa e recepcion na e restaurant Screaming Eagles. Manera ta custumber, despues di e evento di parlamento, parlamento ta ofrece un almuerzo pa su invitadonan. Aki e fraccion a opta pa tambe ‘boycotia’ esaki door di no presenta, cu excepcion di e presidente di parlamento.