Gobernador: Lo incorpora reglanan presupuestario den nos constitucion

ORANJESTAD – Manera anticipa, e crisis presupuestario di e ultimo lunanan a domina e discurso di gobernador interino Tromp Yarzagaray, na apertura di e aña parlamentario di e aña aki. Un discurso cu , manera tur hende sa caba ta wordo prepara completamente pa gobierno di Aruba, a expone puntonan di kico por spera den e proximo aña pa remedia e situacion aki tambe. E discurso ta delinea un maneho ‘diferente’ unda cu gobierno ta mustra cu nan lo haci tur posibel pa evita un ‘scenario’ igual ripiti den futuro. E ta mustra cu mientras cu nan ta para ariba cu gobierno y parlamento tabata den su derecho, lo percura pa traha pa ‘fortifica’ e lasonan pa drecha e relacionnan ‘daña’ atrobe.

Como ehempel, gobierno ta anuncia cu e ‘ aña parlamentario aki lo inicia e proceso pa incorpora e reglanan presupuestario den nos constitucion . Asina cu e obligacion constitucional aki drenta na vigor, lo institui un Conseho Fiscal di Aruba cu lo sigura su mes cu e reglanan constitucional aki wordo implementa na un manera debido. E Conseho aki lo existi di dos miembro apunta pa Gobierno di Aruba y un miembro apunta pa e conseho di minister di Reino. E peticion pa fortifica e "checks and balances" necesario pa bon funcionamento di un estado di derecho manera nos kier na Aruba ta den ehecucion. Instancianan manera Contralaria General, Conseho Consultativo y nos sistema hudicial, no solamente mester sinti cu nan por opera independiente y sin ningun presion indesea di ningun sector of instancia, pero tambe cu nan mes ta tuma iniciativanan pa reforsa nan capacidad y funcionamento objetivo y autonomo’. Sosten di Gobierno pa e meta aki ta un señal di madurez legal di nos estado di derecho cu ta ehemplar den mundo awendia.

Gobierno den e discurso, a subraya tambe e ‘democracia parlamentario’ cu a keda atacha, pero mes momento ta boga pa lazonan mucho mas fuerte unabes cu e ‘crisis’ aki pasa. Como muestra, ta recorda parti di e discurso di e aña anterior pa prueba nan punto. ‘ “ Den e discurso teni na apertura di aña parlamentario 2013-2014, a referi na varios ocasion na e lazonan estatal entre paisnan di Reino Hulandes y riba e hecho cu - entre otro - e democracia parlamentario cu nos tin ta parti esencial di e lazonan aki. E sucesonan di e ultimo lunanan di e aña aki, cu a pone relacionnan den Reino na prueba, no por keda sin wordo menciona. Institucionnan caminda ta traha activamente pa mehoracion, no ta statico. Nan mester adapta nan mes na e circumstancianan actual pa por sirbi e necesidad di su miembronan. Cu pleno confianza den e conviccion di e capacidad di resistencia di nos Reino y respet entre paisnan den Reino na tur banda di e oceano atlantico, lo kita tur duda cu por a surgi cerca hopi ciudadano di Reino riba e futuro di nos estado di derecho y lo fortifica e confiansa den institucionnan existente. Esaki lo resulta den un Reino cu relacionnan mas fuerte, cu formanan di comunicacion mas habri y procesonan di tuma desision mas den union. E ta un resultado cu - kisas lo tuma tempo pa cristalisa- pero cu na final lo beneficia henter Reino y tur habitante di tur e paisnan di Reino. “

Cu e parlamento y gobierno a sufri di e ‘crisis’ aki, ta notable y a manda un mensahe atrobe pa sigura cu e loke a pasa, no por ripiti. “ Aña pasa miembronan di Parlamento di Aruba a ricibi e mensahe cu nan "como representante di pueblo, ta forma parti di e organo constitucional di mas halto di Aruba. Sin [nan] Gobierno no por funciona; sin [nan] Aruba lo no existi den e forma cu nos conoce". Awe e mensahe aki ta wordo reitera. E Parlamento di Aruba ta e organo mas importante di Pais Aruba, pero den e orden constitutional di Reino Hulandes. Incidentenan cu nos por experiencia, no tin mag di hiba e 21 miembronan di e parlamento aki na ningun otro conclusion riba nan funcion. Ta pa e motibo aki un yamada ta wordo haci un biaha mas pa sigui - den representacion di pueblo di Aruba - cu e trabou legislativo y di supervision di e maneho di gobierno. Diferencianan di opinion no ta nifica division den pueblo. E combinacion di expresion liber di opinionnan diverso y aceptacion di desisionnan democratico ta esencial pa e stabilidad di nos pais como un democracia activo y asertivo na desaroyonan.” Gobierno ta mustra tambe cu “ no por sera wowo ni orea pa e discusion y diferencianan di opinion riba maneho financiero y aplicacion di instrumentonan constitucional cu ta tumando luga den nos pais y entre nos gobierno, gobiernonan di Corsou, Sint Maarten y Hulanda y gobierno di Reino.”

Y cualkier indicacion cu gobierno lo kier ‘separa’ y ‘bula afo’ di Reino, tambe a keda desbarata. “Nos conviccionnan democratico y nos confiansa den e estado di derecho di e Reino cu nos a scohe pa sigui ta parti di dje, lo ta nos guia pa trece claridad den e relacionnan, miho comprension di e normanan comun di Reino y cu un union mas fuerte entre e paisnan. E proceso aki lo tuma su tempo. “ e discurso ta termina. (lesa e discurso integral di gobernador Tromp aki)