Paul Croes: Evaluando retiro completo como minister

ORANJESTAD - Minister Paul Croes a kibra su silencio diasabra mainta, casi 3 luna despues cu ministerio publico a considere oficialmente un sospechoso den e caso Ibis. "Un odisea dificil pa'mi famia, amistadnan, coleganan" Croes a cuminsa na bisa. Hopi cos di e caso mes no a sali dilanti, simplemente pasobra no tin informacion cu OM ta compartiendo cu ne y su abogado Marije Vaders, cu tabata cune durante e conferencia. Loke si a resalta ta cu e ta evaluando pa tuma su retiro completo como minister, mirando cu ta durante mas largo cu a kere. Di otro banda, ela anuncia cu for di awe caba (diasabra) e ta cuminsa campaña activamente como politico/ciudadano pa e proximo eleccion y lo haci esaki den districto di Noord. 

SECUESTRA EMOCIONALMENTE

Croes ta considera cu e loke a sosode cune ta un secuestro emocional pe y su famia. Ademas e ta considera inhusto con ministerio publico a secuestra parti di gobernacion e tempo aki. "Nos ta millimeters verder di loke nos tabata for di 28 di maart" Croes a bisa, indicando cu nada nobo no a bin dilanti. Su abogado a bisa cu despues di un caso sumario contra OM, nan a logra haya apenas 15 pagina di documento, pero nada relevante pa e caso mes. Croes mes ta consciente cu esaki por ta 'momento di hubilo pa contrincante politico y cu nan lo ta probechando inmensamente di e momentonan aki."Mi ta lamenta cu nan ta huesnan prome cu e caso". 

RETIRA COMPLETAMENTE COMO MINISTER

E mandatario a mustra cu mirando cu a kere cu e caso aki lo a dura uno corto (e investigacion), ela opta pa tuma e paso di hala atras temporalmente pa OM por a haci su investigacion. Riba pregunta di NoticiaCla pakico no a opta pa retira completo for di comienso, el a mustra cu esey lo a duna indicacion cu e lo por ta culpabel di algo. Y asabiendas cu e sa cu e ta inocente, no kier a tuma e paso ey. "Si bo wordo acusa di algo cu bo ta inocente, ta bira dificil pa tuma retiro, pasobra e ta indica cu lo bo por ta culpabel. Lo reevalua toch awor si ta tuma retiro completo of no" Croes a bisa. P'esey mirando cu e situacion ta durando mas largo, awor e ta den proceso di evaluacion pa dicidi si por tawata miho pa e retira completo como minister. E desicion ey a bin di dje, segun e mes a bisa e portal aki, y e desicion ey lo wordo tuma den e proximo dos simannan aki den conferencia cu partido AVP. E no ta considera (su abogado a subraya esey tambe) su situacion mescos cu e politico di Bonaire cu diabierna a entrega su retiro como diputado  (Clark Abraham), no obstante cu e si den su carta ta bisa cu e no a haci nada y cu e acusacionnan no ta berdad. "Su situacion ta diferente" Marije Vaders a bisa, argumentando cu compara cu Croes, Abraham su caso ta diferente. Aki el a haya su documentonan, a bay sera un par di dia, a bringa su detencion dilanti huez y a gana esaki. Awe e ta liber pendiente su caso. Esey no ta loke a sosode cu Croes, y como tal no por compara e caso. Croes mes ta bisa cu cada persona ta actua diferente y esey tabata desicion di Abraham, y di dje ta diferente. Scucha e conferencia COMPLETO AKI.