The Lab Online Marketing nomina pa Best in Business Award

ORANJESTAD - The Lab Online Marketing recientemente a wordo nomina pa e Best in Business Award  di Guardian Group Fatum. E premio aki ta duna empresarionan cu ta kere cu nan por contribui positivamente na e desaroyo di Aruba, e oportunidad di gana Afl 10000,- cash.  The Lab a califica como un di e 6 finalistanan for di 63 organisacionnan cu a participa. 

Recientemente, Diederik Kemmerling, Managing Partner, y Zarianni Larmoni, Community Manager, a wordo invita dor di Magic FM pa splica mas di The Lab y dicon nan ta pensa cu anan ta e “Best in Business”. Riba diabierna, 23 di juni, nan a duna un presentacion dilanti huradinan experto unda nan a elabora mas pakico nan compania mester gana. Ademas, dialuna awor, dia 26 di juni, nan lo ta papiando na e talkshow Nos Mainta, unda nan lo splica kico ta haci nan compania resalta. E resultado oficial di e competencia aki lo wordo duna dia 29 di juni durante un cocktail party na Tierra del Sol. 

The Lab Online marketing a wordo funda na aña 2012 y awor ta consisti di un team entusiastico di 6 hende, cu e obhetivo pa yuda companianan, grandi y chikito, pa bira mas visibel online y cu esaki aumenta benta y bira exitoso. Usuarionan di internet a aumenta rapidamente den e ultimo añanan y 85% di e pueblo di Aruba ta uza Facebook. Dor di esaki, tin un oportunidad grandi cu Mercadeo Online. The Lab actualmente tin oficinanan na Aruba y Curaçao. Servicionan cu nan ta ofrece ta inclui, pero no ta limita na: Search Engine Optimization (SEO), Search Engine Advertising (SEA/ Adwords) y Facebook Advertising/ Community Management. Con esaki ta contribui na e desaroyo di Aruba ta cu dor di yuda organisacionnan local bira exitoso, esaki ta influencia Aruba su economia positivamente. The Lab a yuda varios companianan chikito cu tabata casi den bancarota, pa crece y bira exitoso danki na Mercadeo Online. Tin un potencial grandi pa yuda hopi mas companianan bay dilanti. Pa e motibo aki, e team di The Lab ta hopi positivo den e competencia aki y spera cu confiansa pa e resultado di e Best in Business Award dia 29 di juni.