De Sousa: Ta bolbe riba lista AVP pa grupo vulnerable di comunidad

ORANJESTAD - Desiree de Sousa Croes ta bolbe toch riba lista di AVP pa e proximo eleccion. E mes a confirma esaki pa NoticiaCla awe, cambiando asina su pensamento di un aña pasa cu e tabata cla cu politica. Gran parti di e desicion tabata e rechaso di su propio coleganan di fraccion pa e tema di union civil y derechonan pa e grupo LGBT (Lesbian, Gay Bisexual and Transgender).  Pero tambe a haci un apelacion riba dje pa keda, mirando cu tabatin hendenan cu a bandona e partido y mester di hende fuerte pa mantene e partido. Entre otronan cu tambe a keda toch, tin Clarisca Velazquez, y actual ministernan Schwengle y Bermudez. Tur tres e portal aki a raporta riba nan cambio di desicion. 

MOTIBO PA BOLBE RIBA LISTA

Segun de Sousa, aña pasa politica pa e politico tabata 'been there, done that' esta cu e tabata cla cu politica y a anuncia cu mientras cu e ta keda un avepista, e no ta bolbe riba lista. For di e tempo ey, e tabatin varios combersacion cu e.o. lider di partido y hendenan den comunidad, entre nan lidernan di e grupo LGBT. "A bin un punto hopi dilanti cu e grupo specifico aki lo sinti cu no tin un representante. Fuera di esey hendenan di nos mesun bario a papia cumi" de Sousa a sigui bisa. "Ma tuma e desicion cu bo sa, mi ta kere toch mi por haci un diferencia ora cu mi ta den wega" de Sousa a sigui bisa. Dos luna pasa ela tuma e desicion pa ta toch habri pa loke ta pasa den e temponan cu ta bin. Berdad tambe segun de Sousa, e peticion a bin pa e keda pasobra partido ta perdiendo varios persona. "Esey tambe a hunga un rol, pa mi keda. Mi no ta un persona cu ora cu cos bira cayente, mi ta hala di unda mi ta". E ta bisa cu e no por laga hende na caya. 

CON TA CU COLEGANAN CU A LAG'E CAY PA LGBT 

Tin tambe e asunto unda cu un grupo di colega di e mesun fraccion, esta AVP a lag'e cay ora cu tabatin e asunto di amienda riba union civil. Con e tin cu bay deal cu e mesun coleganan cu a lag'e cay y toch sigui cu nan despues. E ta sigura cu el a combersa cu e coleganan aki mes tambe. "Otronan ta bisami, riba asina hopi punto nos ta di acuerdo, solamente no riba esey. Tin un colega cu a bisami, keda pa bo convencemi", de Sousa a sigui bisa. Ademas e mayoria den e fraccion ta sostene, cu ta 8 persona contra 5 cu no tabata sostene. Awor esey ta 7 pro y 5 contra.  "Esey ta ponemi pensa toch cu ta algo principieel. Esey a ponemi pensa masha hopi cu mi por tin mas respet pa e persona cu e ta pensa. E ta bisami mi no ta contra bo, contra e grupo, pero mi ta pensa diferente, ban papia erover" de Sousa a bisa. E ta mustra cu ainda tin un tarea importante pa e traha ariba. Scucha e entrevista AKI.