Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

Posted on 06/23/2017 11:34 am AST | Updated on 06/24/2017 12:15 am AST

E siman aki nos por a mira con arogancia den politica aki na Aruba parce di no tin limite. Nos por a tuma nota e.o. di un entrevista realisa pa NoticiaCla cu dos minister di e actual gobierno cu e proposito pa sa si nan lo continua den politica y e motibo dicon nan e escoge pa sigui. Tambe nos por a mira e actitud di un minister cu ta sinta na cas ta cobra, ta bin cuestiona e investigacionnan rond su persona y cu ta trata di algo politico aki.

Ta increibel pa lesa con e tres ministernan aki, esta Bermudez, Schwengle y Paul Croes ta rebaha te hasta humiya e candidatonan di e partido AVP, como tambe di tur esnan cu ta pensa di deposita nan voto riba e partido. 

Napoleon Schwengle ta sigui duna muestra di su arogancia y ignorancia. Pasobra ta su persona so ta di opinion aki na Aruba cu ela haci un “bon” trabou, alegando cu "mi ta sorry pa bisa, pero e politico tradicional, ami no ta mira cu nan ta bay ta interesa pa caba mi trabou". Pa cuminsa, cua “bon” trabou e ta referi na dje? E ta bay sinembargo mas leu ora e ta cualifica su coleganan di partido como inferior y incapas pa eherce e funccion di Minister di Salubridad cu su declaracion di “no ta mira den e fraccion awor, cu tin un candidato cu a profila su mes pa bay tuma over cuido medico. Lo mi "challenge" cualkier un di nan si nan kier tuma over, pero demonstra cu bo por miho cumi si". Esaki ta toppunt di arogancia y un “brevet van onvermogen” pa su propio coleganan.

Bermudez di su banda ta duna muestra di kier hunga “hard to get”. E no mester di e cash ni tampoco di e dolor di cabes, pero toch e kier sigui como minister. Aki e ta, mescos cu Schwengle, duna e miembronan di AVP un "brevet van onvermogen", pasobra ta e so por y no esnan riba e lista berde. E ta e superman cu incluso por handle dos cartera pareu. Na mesun momento e ta reconoce cu e ta e mucha manda di Mike Eman, pasobra tanto “sabi” cu e ta, toch Eman a oblig’e bay na su amen ora cu ela prohibi’e di introduci e ABB y otro cambionan cu ela bin cu ne. 

Pa corona obra nos ta haya e situacion di Paul Croes e siman aki. Mientras cu e ta bou investigacion y ta riba un sorto di “schorsing”, cobrando na cas, ayuda pa un ley cu nan kier acomod'e y un fraccion den Parlamento cu no tin weso di lomba, p’ele ta mas importante pa reclama su posicion riba lista di AVP y na mesun momento bisa cu e ta bay campaña. Paul Croes di forma aki no solamente ta insulta su mes un partido y votadonan di e partido aki, pero e ta bira un berguensa pa e mundo politico y mas ainda un berguensa y insulto pa e pueblo di Aruba. Paul Croes ta bay asina leu di tilda e trabou di Ministerio Publico pa cu su persona como un acto politico. Pregunta mester ta: di ken? Di oposicion? Of di su propio hendenan? Mientras e kier sinta tambe den stul di hues, alegando cu e ta inocente. 

Como young professional Paul Croes sigur a desapunta e miles di professionals aki na Aruba. Esaki sigur e grupo aki no ta spera di un politico y mandatario, pero mas aun di uno cu tambe ta yama su mes young professional. Paul Croes ta bisa cu e t'ey bek, pasobra “no a pasa nada”. Pero segun informacion cu nos no ta trata aki di “djis un tiki” ontheffing cu ela firma, pero di miles, mas di dos mil (2000), ontheffing. Anto ontheffing cu conseho negativo y cu a perhudica mas di 2000 yiu di tera haya un trabou pa gana un pida pan. Pero ya, “nada no a pasa”?

E actuacion di e mandatarionan aki, mescos cu nan amo Eman, por wordo categorisa como narcisista. Nan so sa con pa haci un “bon trabou” y ningun otro hende mas, pero mas importante ta e conclusion cu e 9 ministernan no tabata necesario. Schwengle ta traha "parttime" pa di e forma ey entre otro evita cu un otro longarts, Arubiano, wordo tuma den servicio y Bermudez ta haci trabou di Paul Croes sin keha, mientras Paul Croes tin 3 luna na cas cobrando y awor hasta cla pa bay campaña. Esakinan ta prueba cu a dicidi pa expande e cantidad di minister pa djies acomoda candidatonan riba lista di AVP y evita problema. 

Interes general no ta bin na prome lugar pa e partido berde y esaki lo tin su consecuencianan grandi pa formacion di otro gabinete Eman, Dios spaar nos, pasobra lo mester cumpli cu esnan cu tin e intencion di bandona e partido si no cumpli cu nan exigencianan. "Por la plata baila el mono"!

Nos pueblo mester rechasa corupcion y arogancia di esnan cu supuestamente mester sirbi e pueblo y e unico opcion ta exigi Bon Gobernacion di inmediato. Mara man di e politico lo evita otro masacre financiero pa nos Isla. UPP ta e "real deal" pa un Miho Mañan.

 

Booshi Wever

Lider di UPP

Brazil 163

 

 

 

 

  • Opinion: Mi yui Po Sing Fan ta innocente

    Opinion:  Mi yui Po Sing Fan ta innocente

    Apreciabel sr Redactor. Na prome lugar mi ta grandicibo pa e espacio pa mi como mama di mi yui, Po Sing, por expresa mi mes tocante e caso di mi yui. Cu awa na wowo y un dolor inmenso mi a scucha con Juez den e caso di wayaca a sentencia mi yui na 20 anja di castigo di prizon. Ami como mama di mi yui sa cu mi yui ta innocente di tur e acusacion nan menciona. Na e inicio di e investigacion hopi cos a bai robez y mi ta di opinion cu esnan envolvi a busca y hasi envistigacion robez. No ta pasobra mi yui a duna Echabardo un lift y buske bek e mester tabata sa di e suceso aki. Pasobra ta hopi biaha mi yui sa duna Echebardo un lift y hopi otro hende mas hende den su bida. Esaki tabata algo comun pa mi yui. No ta paso mi yui a huur un auto pa Echebardo, kiermen cu mi yui tabata sa kiko e persona aki tabata di bai hasi pa cu e caso aki. Es mas e sa huur auto varios biaha pa Echebardo den pasado y sa huur pa otro hende tambe. Mi yui ta un persona cu semper a saka un man pa juda hende ora e por. Mi ta sinti cu husticia di Aruba cu tur respet, a faya y kier culpa mi yui pa sconde e berdad mes. Sra Juez, bin splica ami y mi famia, con por ta posibel cu mi yui tin tur cos den su bida, su mesun negoshi, su mesun plaka, su dos cas nan y mucho mas, kiko lo tabata su motibo pa laga comete un atraco sabiendo cu e tin tur cos y no falta nada. Nos por a scucha den corte con Echebardo a tilda e yui di e defunto y ningun musca a bula. Asina tin hopi cos bisa den corte cu no a sali den prensa y tambe cu no ta cuadra cu e realidad. Nos ta di opinion cu Sra Juez a wordu mal informa door di autoridadnan y e Fiscal concerni. Lamentablemente Echebardo a compromete su mes pa no a papia e berdad den corte. Por ultimo mi kier a remarka cu tin un diferencia grandi entre mi yui y e otro nan. Mi yui semper ta responsabel riba su mes y nunca a depende di su mama of tata. Pero e otro nan si. Nunca nos a laga sa cu nos no ta confia nos yui cu plaka. Por lo pronto te aki nan. Famia Fan.

  • Opinion: PA INTERES GENERAL!?

    Opinion: PA INTERES GENERAL!?

    pa Armand Hessels

  • Opinion: UN RST AUTONOMO?!

    Opinion: UN RST AUTONOMO?!

    Pa Armand Hessels

  • Opinion: Humilde

    Opinion: Humilde

    (PA ARMAND HESSELS)

  • Opinion: Secuencia robes

    Opinion: Secuencia robes

    SECUENCIA ROBES pa Armand Hessels

  • Opinion :Con a para cu e Proyecto di Isla di Oro

    Opinion :Con a para cu e Proyecto di Isla di Oro

    Skirbi pa Clyde Harms

  • Powered by SETAR