No ta inverti den proyecto cu nifica aumento di tarifa di awa pa pueblo

ORANJESTAD - "Nos no ta inverti den proyecto caminda cu nos mester pasa aumento di tarifa na comunidad. Mi por priminti nos comunidad cu nos ta trahando riba dje." Na palabra director di WEB Aruba NV Luis Oduber. Segun e director,  WEB ta haciendo tur lo posibel pa minimalisa mal uzo di awa na Aruba. Ora cu tin lekkage, ta purba coregi esaki y busca alternativa. Ta uzando e sistema di RAS, Reliable, Affordable, Sustainable den tur proyecto, pa controla si nan tin un prijs cu por mantene e tarifa existente of reduci esaki.  

OPERACION PA REDUCI DEPENDENCIA RIBA FUEL OIL 

Aworaki ta instalando e almacenahe cu ta e siguiente paso den energia renobabel. Fin di e aña aki ora cu esaki ta den funcion, lo tin tanto bateria como e flywheels funcionando. E sistema di automatisacion ta hayando un 'upgrade', y na e momento ey, lo mira e fruto cu esaki ta bay saca. Despues di esey, por determina si eventualmente tin rebaho di tarifa of no. A admiti cu na 2006 a haci estudio y e tempo ey fuel oil tabata enemigo number uno di WEB. A dicidi e ora ey cu tin cu haci un cambio y a dicidi cu mester a haci esaki den un forma drastico. Prome cu 2006, WEB a opera practicamente tur tempo riba energia di steam pa dray turbina di vapor y tambe produci awa. E costonan tabata subi drastico, y a busca e alternativa den motornan recip y tambe e energia renobabel y cambia e proceso di produci awa. A haya haya un reduccion total di 2006 pa aworaki di casi 42% di fuel oil ta wordo usa aworaki. Esey sinembargo no ta nifica cu pueblo ta haya un rebaho e ora riba e cuenta di awa. "Esey ta pasobra e inversionan tin cu wordo paga, y naturalmente ta sigui inverti pa garantisa e suministro. E ta un proceso y no ta unda cu WEB kier ta ainda. "Ainda nos tin boiler den servicio. Si antes tabata opera 7 boiler, awor ta opera 2 boiler normal, y ora ta necesario ta start un di 3 boiler. E ta un sistema menos eficiente, pero tin cu wanta esaki te ora cu bin un desicion diferente, segun e director di WEB a sigui bisa. 

OTRO LUNA BISTA RIBA GAS NATURAL

Otro luna WEB ta ricibi e final di e estudio di gas natural. Oduber ta kere cu pa otro luna lo tin un miho bista riba e desaroyo di gas natural. "Esey lo bira un cambio drastico cu ora cu nos haya e cifranan, nos por weita kico esey ta trece pa nos den futuro.