Caso asesinato cu veneno di djaka den juice, ta mayan pro forma den corte

ORANJESTAD - E caso di intento di asesinato y asesinato cu veneno di djaka den juice, ta bin dilanti diabierna awor den corte, den pro forma pues no ta trata e contenido mes. Esey lo sosode riba un otro fecha. Sinembargo diabierna e sospechoso S. lo presenta dilanti hues si. E ta wordo acusa di asesinato di un persona y intento di asesinato pa dos otro. 

CARGONAN OFICIAL

Segun e rol oficial di Corte, S. ta wordo acusa di asesinato di un persona riba 22 di november 2016, dor di, intencionalmente y cu premeditacion y calmo, a pone garnachinan di veneno di djaca conteniendo Brodifacoum o sea un sustancia venenoso, den un paki di juice di apelsina, despues di cual e persona a bebe un of mas glas y a consecuencia di cual ela fayece. 

S. ta wordo acusa di intento di asesinato di un otro persona riba 22 di november 2016, dor di pone e veneno di djaca den un juice di apelsina, despues di cual e di dos persona aki a bebe un of mas glas.

E ta wordo acusa di intento di asesinato di un di tres persona riba 22 di november 2016, dor di pone e veneno di djaca den un juice di apelsina, despues di cual e persona aki tambe a bebe un of mas glas. No ta conoci ki dia lo trata e contenido mes di e caso. E tratamiento di e caso, como tambe e pro forma di mayan diabierna, lo ta tras di porta cera relaciona cu e edad di e sospechoso.