Dos minister cu no tabata pa bolbe, dispuesto pa keda toch

ORANJESTAD - Dos minister di AVP ta dispuesto y kier bolbe den un eventual gobernacion di signatura cu AVP aden. Ambos no tabatin plan pa continua, pero awor ta pensa otro. Minister Alex Schwengle a bisa hopi cla na comienso di su carera como minister cu e t'ey pa un solo termino, ya cu su profesion ta docter. Angel Bermudez no ta politico y a bisa cu e ta bin sirbi pueblo tanten cu e partido na mando haci un apelacion riba dje. Tanto Bermudez como Schwengle a bisa NoticiaCla cu nan ta cla pa bin bek den nan funcion. Cada uno tin nan condicion claro. 

SCHWENGLE 

Schwengle ta bisa cu den principio ela spera cu e por a haci tur pasonan grandi den un solo termino y caba cu nan tambe. "Pero e stapnan ta grandi y importante pa haci y e ta rekeri un tiki mas tempo" e mandatario a bisa. Esey ta nifica cu pa e por continua cu su pasonan, e mester bolbe como minister pa por logra esaki. No ta algo planea, pero necesario. "Mi ta sorry pa bisa, pero e politico tradicional, ami no ta mira cu nan ta bay ta interesa pa caba mi trabou" Schwengle a bisa. Ora cu e portal aki a puntra e mandatario, si esey ta nifica cu e ta bolbe riba lista, ela bisa cu si. "Si. Asina mes". Pero no tin garantia cu e por bira minister atrobe, pero por palabra cierto cosnan. No tin e palabracion ey haci awor. "Pero bo ta asumi cierto cosnan cu den principio si bo tin suficiente sosten, bo por boga pa bo haya bo tweede termijn" Schwengle a bisa. Mes momento e ta bisa cu e no ta mira den e fraccion awor, cu tin un candidato cu a profila su mes pa bay tuma over cuido medico. "Lo mi challenge cualkier un di nan si nan kier tuma over, pero demonstra cu bo por miho cumi si" Schwengle a bisa. 

BERMUDEZ

Angel Bermudez, actual minister di finanza a bisa e portal aki cu e no ta riba ningun lista y no ta participa den campaña politico. Y ta algo cu e no ta haci nunca. "Mi ta yuda ora cu nan pidimi pa yuda. Si acaso despues di eleccion nan bolbe pidimi, mi ta kere cu nos tin cu mira e resultado. Y tambe mi ta wak den ki team. "I dont need it, I dont need the cash, I dont need the headache" e mandatario a bisa. Tambe ta depende di e ekipo. "Tin hopi cos pa haci ainda. Si mi wak cu e oportunidad t'ey, semper y cuando mi ta tum'e den bon consideracion" Bermudez a bisa. E no ta 'claim' ningun posicion, pero si nan puntrami, y mi ta duna nan un piece of my mind di kico mi ta kere cu mester sosode" Bermudez a sigui bisa. Entre nan mester bin, segun e mandatario, un reforme fiscal di e sistema di belasting  y douane. Si esey wordo duna espacio, mi por considere" Bermudez a bisa. E pensamento aki ta no obstante cu e mandatario den e gabinete actual, a haya varios contratiempo pa desicionan cu a wordo bira bek, aunke e mes no ta considera nan, contratiempo. Entre otro biramento di bek di ABB, e asunto di accijns pa reemplasa nummerplaat y mas. Pues, e mandatario ta bisa e portal aki cu porta no ta cera. 'Ik heb geen nee gezegd".