Caminda sera diamars pa ehercicio na aeropuerto

ORANJESTAD – Diamars 9 di September 2014 Aruba Airport Authority N.V. (AAA) lo ta e escena di un ehercicio di emergencia na aeropuerto, cu servicionan di brandweer, departamento di polis, departamento di salud, departamento social y agencianan local den un scenario di emergencia pa test nan abilidad pa responde. E ta un rekisito di International Civil Aviation Organization (ICAO) pa test e Aerodrome Emergency Plan di AAA y agencianan gubernamental di emergencia. Un ehercicio “Full Scale Emergency” (FSEE) ta wordo organisa cu un interval cu no ta surpasa dos (2) aña.

Pa e motibo ei aeropuerto lo ta sera for di 8:35 am pa 10:30 am pa tur servicio di trafico aereo, pero e operacionnan na aeropuerto lo ta habri pa procesa pasahero.

Despues e rotonde na aeropuerto lo ta habri pa duna acceso na e terminal di aeropuerto, pero e caminda principal cu ta cuminsa na Price Smart pa e rotonde Las Americas (Camacuri) lo no ta accesibel pa trafico, cu excepcion di vehiculonan cu lo atende emergencia te cu final di e ehercicio. AAA ta recomenda pasaheronan cu ta biaha den ora di mainta diamars pa ta na aeropuerto 3 ora prome cu e orario di salida di buelo, mirando cu e camindanan pa aeropuerto lo ta sera.