Schwengle: Haci AZV independiente ta wishful thinking

ORANJESTAD - 'Wishful thinking' ta loke minister di Salud Alex Schwengle a bisa NoticiaCla riba e pensamento pa haci AZV autosuficiente y financieramente independiente. E ta basa su mes riba e sugerencia di entre otro College Aruba Financieel Toezicht (CAft) su ultimo rapport, pero cu segun Schwengle ta bisa ta nada nobo. "E tema no ta di awor, ta aña den aña afo. Tur aña bo ta tende mesun cos di Raad van Advies (RvA) tambe y CAft" e mandatario a bisa. E aña aki CAFt ta relata cu tin un discrepancia riba e suma cu AZV mester, y cu mester wak si por independisa y haci'e financieramente autosuficiente. 

IDEANAN 'LEUK EN AARDIG'

Segun e mandatario, e dos instancianan ta sali di e punto di bista cu Aruba ta un pais grandi. "Nan ideanan ta leuk en aardig pero nan no ta mir'e den contexto di kleinschaligheid" e mandatario a sigui bisa. E pensamento ta pa saca e 'AZV constructie' completamente for di man di gobierno. Esaki ta significa cu e directie ta 100% responsabel pa e presupuesto. E ta significa tambe cu nan tin cu percura pa si tin mester di placa, pa subi e prima, sin discusion cu ningun partner social. "Bo ta wak esey pasa na Aruba? I dont think so" e mandatario a sigura e portal aki. Tambe segun e mandatario, e dos instancianan aki ta haci manera cu ta placa priva esaki ta. "Mas cu 90% di e placa ta placa social. Full e placa ta sociaal geld. E ta bin di pueblo" e mandatario a bisa. Ela repasa pasado unda cu e sistema di PPK tabata 75% dependiente. E otro grupo tabatin SVB of seguro particular. "Nan tabata trata manera Dios y e PPK mester a warda. Semper tabata asina. Nos tur a toler'e, pero nos niun no tabata happy cu ne. Esey tabata puur discriminatie". AZV a kita esey pa un gran parti. 

SACA MAN DI GOBIERNO AFO

Segun Schwengle, e no ta mira den e sistema social cu nos tin (solidarismo) cu nos por djies saca gobierno afo. "Daar gaat het om" e mandatario a sigui bisa. E kier a bin cu un protocol pa cambia cierto cosnan, pero no a logra, unda cu kier a bin cu un presupuesto basa riba 3 pa 5 aña. No menos cu 3 no mas cu 5. Y ta determina kico kier haci y cuanto kier sacrifica. 

DENKFOUT DI RAAD VAN ADVIES

E denkfout cu RvA ta haci segun e mandatario, y CAft, ta solamente placa. "E servicio t'ey pa sirbi un necesidad. Djey mi ta wak con mi ta pag'ele. Bo a separa kico ta necesario y kico ta luho". E ta admiti cu no a inverti den e ultimo dos pa tres aña den AZV, cu a pone cu kostengroei a keda den casi 0% pa basta aña. Consecuencia ta cu e tempo di espera a aumenta mas cu nunca ainda. E tabat'ey, añas caba. Algo cu ta existi di añanan 60. E ta kere cu por los op e problema, pero ta un cuestion di paga. "Si bo kier a, bo tin cu paga pa A, si bo kier B, bo tin cu paga pa B". 

PENSAMENTO DIFERENTE TA PA UN MOTIBO

E portal aki a mustra e mandatario cu ta logico cu gobierno ta pensa pa actua prome y wak con ta pag'e despues, mientras cu e instancianan tin cu proteha e placa. Pues bo ta bay haya e dos diferencianan di opinion. Algo cu e mandatario ta di acuerdo cu ne. Y ta netamente pakico mester a bin cu un 'CAft' pa motibo di gastamento di 'nos ta wak con ta paga esaki despues'. "Ami lo tin gana di hiba un debate cu nan e ora. E ta choices cu bo tin cu haci. Si choice di pueblo ta mas asfalt, mas klinker enz, e ora mi ta bisa ok, pero no ta resta placa pa e nodige zorg groei. Pero si pueblo bisa no, nos kier elimina wachttijden of casi elimina, nos kier miho hospital, ta cuestion di prioridad. Daar gaat het om". 

GOBIERNO MESTER STOP DI BISA CU AZV NO TIN RAZON

Gobierno tin cu stop di bisa cu AZV no tin rason. E mandatario ta lamenta cu e mester papia asina di su propio gobierno, pero esey ta e berdad segun e mandatario. "Nan (AZV) ta haciendo un tremendo job, pa tene nan kosten bou control. Mi a bisa, mi mester tanto ruimte pa tur e mehoracionan cu nos kier haci" e mandatario a finalisa bisando.