Lacle: Tin total di 700 accidente di trafico pa luna na Aruba

ORANJESTAD – Cu por lo menos 700 accidente pa luna na Aruba, polis ta preocupa cu e situacion y kier pa e asunto aki keda reduci barbaramente. Vocero di polis Lito Lacle a comparti e cifranan aki dialuna merdia, y mustra con serio e situacion ta. Pa dia segun Lacle tin por lo menos 22 pa 23 dalmento, cu ta produci mas of menos 10.000 dalmento pa aña cu ta algo alarmante. Durante e proximo seminario di Ennia Now, polis lo enfoca riba e prevencion di accidente como un topico specifico.

MESTER CONCIENTISA PUEBLO

A calcula e cantidad cu ta pone cu e aña aki mas of menos 700 accidente ta tuma lugar pa luna. Kier baha esaki te na 100 menos. Mayoria di e dalmentonan cu ta tuma lugar segun Lacle, ta debi na ‘ser dehado’. “Nos kier concientisa e pueblo di Aruba pa ta mas conciente ora cu bo ta den trafico” Lacle a bisa. Hopi di e problema ta cu e chauffeur den accidentenan no ta admiti e motibo real di e accidente. Como tal e expertonan den trafico ta mustra cu e ta algo cu tin di haber cu comportacion cu no ta normal den trafico.

CELULAR DEN TRAFICO

“Un di e motibonan principal cu esaki ta pasando, lo ta celular” Lacle a sigui bisa. A confirma cu e ley di celular ta den Staten caba y a urgi pa pasa esaki pa caba pa por uza esaki. Di otro banda, danki na e aumento di control di polis den trafico, e cantidad di morto den trafico a baha drasticamente. A yega ora pa traha preventivo riba e asunto aki. Mayoria di accidente ta pa causa di velocidad halto tambe. Tin te awor 3 morto den trafico cu brommer, cu no ta normal segun Lacle.