Kiwanis Club of Aruba ta presenta e edicion 2015 di su projecto Kamishibai jama ‘No ta mishi!’

Posted on 9/29/2015, 11:44 PM AST | Updated on 9/30/2015, 6:26 AM AST

ORANJESTAD - Kiwanis Club of Aruba a organisa un conferencia di prensa na Fundacion Respeta Mi pa anuncia e di tres edicion di e projecto pa nos muchanan Kamishibai cual e aña aki 2015 yama ‘No ta mishi!’. E objetivo di e storia aki ta pa combatimento preventivo di abuso sexual di mucha.

Kiko ta Kamishibai?

Kamishibai ta un arte di contamento di storia na un grupo di muchanan cu a origina na Japon. Ora un maestro den klas kier conta un storia for di un buki di mucha (prentenboek), constantemente e tin dificultad cu e no por mustra e muchanan e pintura mientras cu e ta lesa e texto. Ora e maestro mustra e muchanan e pintura e no por lesa e texto, y ora e lesa e texto e no por mustra e muchanan e pintura. Kamishibai ta split e pintura y e texto facilitando e contamento di storia na e muchanan. Riba un sheet di size A3 e pintura di e storia ta wordo inprimi pa dilanti mientras cu e texto correspondiente ta wordo inprimi patras di e sheet. Adicionalmente ta haci uzo di un cashi di palo –un teatro- unda cu ta hinca e sheetsnan aden pa facilita y tambe crea mas drama den e contamento di e storia. E resultado ta cu e grupo di muchanan sinta por wak e pintura dilanti hopi duidelijk mientras cu e maestro trankilamente por lesa e texto inprimi patras di e sheets.

Dicon e projecto Kamishibai?

Contamento di storia ta stimula e desaroyo di un mucha, vooral muchanan chikito. Kamishibai ta un arte pa conta storia conoci den e mundo di ensenansa na Aruba y ta wordo considera efectivo door di e maestronan vooral door cu e muchanan ta focus hopi bon riba e pintura. Instituto Pedagogico Arubano IPA ta duna les na e studiantenan pa maestro di skol di con pa traha Kamishibai como un vak separa. E problema ta cu pa e maestro no ta facil pa e mes traha e teatro ni tampoco pa e traha e sheetsnan. Tambe tin gastonan cuantioso envolvi. Cu otro palabra, den practiva tin un dificuldad di logistica. Kiwanis Club of Aruba kier facilita especialmente den e parti esaki door di haci un donacion di teatro di palo y storianan na skolnan aki na Aruba. Cu e projecto aki di contamento di storia yama ‘Kamishibai’ Kiwanis Club of Aruba kier haci un contribucion na e desaroyo di muchanan aki na Aruba.

Kiko e edicion 2015 di Kamishibai di Kiwanis club of Aruba ta encera?

E aña aki e club ta haci un donacion di e di tres storia pa mucha yama ‘No ta mishi!’ skirbi door di Liliana Braamskamp-Erasmus na tur e skolnan preparatorio y basico di Aruba. E storia aki ta full nobo skirbi specialmente pa e projecto aki y tin como objetivo e combatimento preventivo di abuso sexual di mucha. E la wordo inspira ariba e kleurboek ‘Panda book’ di Kiwanis club of Aruba cu tin e mesun objetivo y cu ta wordo uza ya pa hopi aña caba na tur skolnan aki na Aruba especialmente durante di e tema ‘mi curpa’. E ‘Panda book’ y awor e storia ‘No ta mishi!’ ta wordo sosteni y usa door di Fundacion Respeta Mi den nan combatimento preventivo di abuso sexual di mucha aki na Aruba. Cu e di tres storia aki Kiwanis club of Aruba ta sigi cu su compromiso pa haci un donacion cada aña di un storia nobo na tur skolnan aki na Aruba.

Kende a contribui pa realisa e projecto aki?

Un danki di curason ta bai na e siguiente personanan cu a contribui na e realisacion di e bunita projecto aki:

Escritora señora Liliana Erasmus, autora di e storia nobo ‘No ta mishi!’; Fundacion Respeta Mi pa nan guia y apoyo durante e projecto aki; Miembronan di Kiwanis Club of Aruba pa a yuda organisa e projecto aki.

Kiwanis ta un organisacion global di voluntarionan dedica na cambia mundo via di un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansaruba.org. Tambe por bishita e website di Kiwanis Internacional na www.kiwanis.org.