Actaa: Reaccion rapido di controladornan aero a evita desastre na aeropuerto

ORANJESTAD – Reaccion rapido di controladornan aereo na Aruba a evita desastre na aeropuerto. Den un comunicado emiti pa e asosacion cu ta representa e grupo di trahadornan aki, esta ACTAA controladornan aereo ta mustra cu nan no ta contento cu medidanan nobo introduci recientemente, y cu esaki ta causando problema. De hecho, desde 1 di september ANSA NV a start un procedura nobo pa cu trafico aereo. Awor ta prohibi nan (controladornan aereo) di uza dos lenguahe pa comunica cu e pilotonan y mag papia solamente ingles. Y den cuadro di esaki, nan ta relata riba e suseso recien. 

PREOCUPACION

Esaki desde un principio no a sinta mucho bon cu e controladornan, mirando cu Aruba no tin radar of otro forma pa wak unda e avionnan ta, y p'esey ta depende completamente riba e comunicacion cu e pilotonan pa por determina unda nan ta bulando. Controladornan ta traha practicamente "blind", no tin niun pantaya, ni nada por estilo caminda por wak unda cada avion ta! Awor a hasi e comunicacion aki mas dificil pa ambos partido, y esaki ya a cuminsa trece situacionnan insigur den nos trafico aereo.

EVITA DESASTRE

Segun ACTAA e luna aki mes a experencia un incidente hopi grave cu danki na accion rapido di nos controladornan no a bira un accidente catastrofico. Ta trata di avion commercial americano American Airlines ya den su careda di despegue (take-off) y un avion priva cu piloto venezolano cu no ta domina ingles bon. E piloto venezolano ta wordo instrui pa "hold short" esta keda pafo di pista mirando cu e avion commercial ta den take-off y simplemente no a compronde e instruction "hold short" cu a wordo bisa varios biaha. Ora e controlador a ripara cu e avion priva ta subiendo pista dilanti esun den take-off a core bisele pa para para y e biaha aki na Spaño pa e piloto por compronde. Pa e ora aki ya e avion priva a crusa e liña di e pista y si no a par'e na ora e lo a subi pista dilanti e avion commercial cu ya ta moviendo na un velocidad hopi halto pa take-off! Un parti substancial di Aruba su trafico aereo ta consisti di hopi avionnan di Venezuela y no ta tur e pilotonan ta domina ingles. Pa añas ta asina cu tanto Aruba como Curacao cu tin e espacio aereo rond di esun di Venezuela ta brinda servicio na Spaño pa tin safety na prome lugar, pa esnan cu nan ingles no ta bon suficiente.

IMPONIENDO CAMBIO IRRESPONSABEL

Awor ta forzando e pilotonan aki pa papia ingles so, causando confusion, y perdemento di tempo door di ripiti cada biaha ora cu pilotonan no ta compronde. Esaki ya caba a bin ta causa situacionnan unsafe y pa es motibo e controladornan no ta haña cu ta corecto pa sigui pone nos trafico aereo na peliger.

PRECUPACION

ACTAA a trece e preocupacion aki caba dilanti serca director Nilknarf Kock pero ACTAA no ta contento cu e contesta cu a haña di dje. E ta insisti pa toch keda "try it out" pa un periodo mas. ACTAA no ta haña esaki safe, mirando cu ya incidente nan a pasa den e mesun "try out period aki" pa via di e cambio aki. Esey ta pasa ora cu director no ta compronde aviacion y no ta hasi esfuerzo pa evita un desaster. Ora accidente sosode mayoria vez ta culpa e controlador y lo por haya castigo di prison.

PROPOSICION

ACTAA ta sinti cu ta bon pa trece cambio, pero den un manera responsabel. A sugeri serca director Nilknarf Kock pa "verschuif" esaki te na momento cu tin un sistema trahando caminda cu e controladornan por monitor(wak) unda e avionnan ta y cu en berdad nan ta compronde y sigui instruccionnan duna na nan.

CONTROL MAS EFECTIVO

Tambe ACTAA ta haña na su lugar pa e autoridadnan concerni hasi e control riba esaki mas efectivo, y no laga e trabao aki na e controladornan cu ya tin hopi responsabilidad den nan man pa segura cu Aruba su aviacion ta draai na un manera sigur. Scucha e combersacion entre e controlador aereo y e piloto venezolano aki.